जरिमैंया साखः सिरपाः लःल्हात

ख्वप(नेपालभाषा टाइम्स)- नेपाल साहित्य मन्दिरं दँय्दसं बिया वयाच्वंगु झिंन्याक्वःगु जरिमैंया सिरपाः साहित्यकार सरस्वती तुलाधरयात लःल्हाःगु दु । वय्कःयात झिद्वः दांसहित सम्मानपत्र लःल्हाना सिरपाः बिउगु खः ।

ज्याझ्वःया मूपाहां नेपाल साहित्य मन्दिरया पुलांम्ह नायः साहित्यकार तिलकप्रकाश कायस्थं उगु सिरपाः लःल्हानादीगु खः । अथेहे थुगुसी झिंछक्वःखुसि कुमार साखः लुमन्ति हपाः सिरपाः नेपालभाषाया गजलकार अनिश शाक्ययात लःल्हाःगु दु । ज्याझ्वलय् हर्षलाल लुमन्ति कोषया दाता कृष्णलाल प्रधानं नेपालभाषायात अझ ब्यापक यायेगु खःसा खस् नेपालीया नापनापं उत्थान याना यंकेमाःगु बिचाः प्वंकादिल ।

विराट गुथिया नायः महेन्द्रगोपाल कर्माचार्यं नेवाः आन्दोलन जूगुलिं जक वर्तमान इलय् तामाङ्ग व नेपालभाषायात बागमती प्रदेशं ज्याखँया भाषा कथं मान्यता बिउगु खः धयादिल । नेपाल प्रज्ञा प्रतिष्ठानया प्राज्ञ व नेपाल साहित्य मन्दिरया नायः अगिब बनेपालीया सभापतित्वय् जूगु ज्याझ्वलय् मन्दिरया छ्याञ्जे हरिशरण शर्मां लसकुस यानादीगु खःसा पुलांम्ह दांभारी गुह्येश्वरी शाक्यं लसकुस म्ये न्यंकादीगु खः । न्हापांगुखुसि जरिमैंया

लुमन्ति सिरपाः त्याकादीम्ह प्रतिसरा साय्मिं नं थःगु नुगः खँ तयादीगु ज्याझ्वलय् सम्मानित व्यक्तित्वपिं सरस्वती तुलाधर व अनिश शाक्यं नं थःथःगु नुगः खँ तयादीगु खः ।