मास्टर व मिस काठमाडौं नेवाः किन्डरगार्टेन ज्याझ्वः क्वचाल

येँ – थनया खुसिबुँइ च्वंगु काठमाडौं नेवाः किन्डरगार्टेनय् स्कुलया ग्वसालय् खुक्वःगु ‘मास्टर व मिस काठमाडौं नेवाः किन्डरगार्टेन–२०१८’ ज्याझ्वः जुल । ब्वनेकुथिया मस्तय्गु प्रतिभा न्ह्यब्वयेगु, आत्मविश्वास ब्वलंकेगु, क्षमता विकास यायेगु ल्याखं उगु ज्याझ्वः न्ह्याका वयाच्वंगु खः । ब्वनेकुथिया संचालक रविन महर्जनया सभापतित्वय् जूगुु ज्याझ्वलय् वरिष्ठ बाद्यगुरु न्हुछेबहादुर डंगोल मूपाहांकथं झायादीगु खः । अथे हे नेवाः बस्ती नेवाः स्कुल अभियानया संयोजक दीपकरत्न तुलाधर व जगतसुन्दर ब्वनेकुथिया प्रिन्सिपल सुनिता मानन्धर विशेष पाहांकथं झायादीगु खः । ब्वनेकुथिया युकेजी तगिंया स्वीनिम्ह मस्तय्सं ब्वति काःगु उगु ज्याझ्वःयात स्वंगू ब्वय् ब्वथलाः न्ह्याःगु खः । ज्याझ्वलय् ¥याम्पवाक, थःगु म्हसीका, थःगु प्रतिभा न्ह्यब्वयेगु ज्यायालिसें थुगुसीया मास्टर व मिस काठमाडौं नेवाः किन्डरगार्टेनया ल्यज्या याःगु खः ।

थुगुसी जूगु ज्याझ्वलय् भाजु राग महर्जनं ‘मास्टर काठमाडौं नेवाः किन्डरगार्टेन’या उपाधि त्याकादीगु खःसा मय्जु रिहाना श्रेष्ठं ‘मिस काठमाडौं नेवाः किन्डरगार्टेन’या उपाधि त्याकादीगु खः । वय्कःपिंत निवर्तमान मास्टर व मिस काठमाडौं नेवाः किन्डरगार्टेन अनय महर्जनं तपुलि व समिरा महर्जनं क्राउन पुइकादीगु खः ।मेमेगु टाइटल उपाधिइ सुर्जला महर्जन–बेष्ट ड्रेस, कुशलरत्न वज्राचार्य–बेष्ट स्माइल, प्रीति आयला महर्जन–बेष्ट वाक, आशिरा महर्जन–बेष्ट पर्फर्मेन्स, रुनिक महर्जन–मोष्ट इनर्जेटिक, सपूm महर्जन–बेष्ट पर्सनालिटी, सुर्जेन महर्जन–बेष्ट स्पोकन व प्रज्ना महर्जनं–बेष्ट नेपालभाषया अवार्ड त्याकादीगु खः ।

वज्रकला कुञ्जया छ्यांजे सुदन मुनिकार, मिस ज्यापु–२०१७ ग्रीष्मा महर्जन व ब्युटिसियन प्रीति महर्जन निर्णायकमण्डलय् च्वनादीगु ज्याझ्वलय् पुलांपिं मास्टर व मिस किन्डरगार्टेन उपाधि त्याकादीपिंसं नं थःथःगु प्रतिभा न्ह्यब्वयादीगु खः ।
ज्याझ्वलय् उपाधि त्याकादीपिंत मूपाहां डंगोलं स्लाय्स व मतिनाया चिं लःल्हानादीगु खःसा विशेष पाहांपिं तुलाधरं दसिपौ व मानन्धरं सिरपाः लःल्हानादीगु खः । अथे हे ज्याझ्वःया सभापतिलिसें ब्वनेकुथिया संस्थापक महर्जनं ब्वति कयादीपिं विद्यार्थीपिंत दसिपौ लःल्हानादीगु खःसा ज्याझ्वःया मूपाहां, विशेष पाहां, निर्णायकमण्डलया दुजःलिसें पुलांपिं मास्टर व मिस नेवाः किन्डरगार्टेन जुयादीपिंत ब्वनेकुथिया निर्देशक राजेन्द्र महर्जनं हनापौ व मतिनाया चिं लःल्हानादीगु खः ।

सम्बन्धित बुखँ

LEAVE YOUR COMMENTS