बालेनयात चकंपौ ! ः ‘बँपसल्यातय्के दुव्र्यवहारया लागिं क्षमा फ्वँ’
येँ (नेपालभाषा टाइम्स)÷ नागरिक आन्दोलनया न्ह्यलुवातय्सं येँ महानगरपालिकाया मेयर बालेन साहयात सतक व्यापारीयात ज्वनेगु व अभद्र व्यवहार याःगु खँय् क्षमा फ्वनेत इनाप याःगु दु । म्हिगः ३२ म्ह नागरिक न्ह्यलुवातय्सं मेयर साहयात चकंपौ च्वसें उगु इनाप याःगु दु ।
नागरिक न्ह्यलुवातय्सं बिउगु चकंपतिइ धयातःगु दु, ‘व्यापारीतय्त कथिं छ्यं लगायत म्हया थीथी भागय् दायेगु व ज्वनेधुंकाः नं अमानवीय व्यवहार याःगुली आपत्ति प्वंकाच्वन ।’
पतिइ महानगर प्रमुखया हैसियतं मानव अधिकार उल्लंघन जुइगु उगु घटनाप्रति जिम्मेवार जुइत व उकिया बारे छानबिन यानाः दोषीयात कारबाही यायेत नं इनाप यानातःगु दु । लिसें महानगरं पीडिततय्के क्षमा फ्वनाः उमित उचित राहत व क्षतिपूर्ति बीमाःगु थःगु दायित्व पूवंकेत विशेष इनाप नं यानातःगु दु ।
अथे हे चकं पतिइ विपन्न जनता प्रति विभेदकारी व बहिष्करणकारी नीति त्याग यानाः सतक व्यापारी लगायत नागरिकया आत्मसम्मान, मर्यादा व जीविकोपार्जनया अधिकार संरक्षण यायेत नं नागरिक न्ह्यलुवातय्सं इनाप याःगु दु ।
संघीय राजधानी शहर दकलय् उदार लोकतान्त्रिक जुइमाःगु खःसां सरोकारवालालिसे खँ ल्हायेगु लुखा तिनाः अलोकतान्त्रिक छवि स्थापित याना यंकाच्वंगु खँय् नं पतिइ असन्तुष्टि प्वंकातःगु दु ।
वंगु फागुन १६ गते नगर प्रहरीया छगू पुचलं येँया लुँहिति लागाय् बँपसः तयाच्वंपिं व्यापारीतय्त आक्रमण याःगु खःसा उगु इलय् उमिगु सामान तहसनहस यानाः अधिकार क्षेत्र हाचां गायाः हिंसा न्यंकेगु ज्या समेत जूगु व उगु तथ्य स्पष्ट रुपं खनेदइ कथं श्रव्य दृष्य सामग्री सार्वजनिक जूगु खँ नं पतिइ धयातःगु दु ।
मेयर साहयात बिउगु पतिइ कनकमणि दीक्षित, इला शर्मा, डा. कुन्दन अर्याल, चरण प्रसाईं, जेबी विश्वकर्मा लिसें ३२ म्ह नागरिक न्ह्यलुवातय्सं हस्ताक्ष्तर यानातःगु दु ।
कवाडीया प्रदर्शन
कवाडी व्यवसायीतय्सं म्हिगः नं येँ मनपा विरुद्ध प्रदर्शन याःगु दु । उमिसं येँ मनपाया पुलांगु ज्याकू दुगु लागाय् म्हिगः प्रदर्शन यानाः नारा नं थ्वयेकूगु खः । कवाडी व्यवसायीतय्सं प्रदर्शनया झ्वलय् ‘फोहोर मुनीपिंत सम्मान या, कवाडीयात डोजर चले यायेगु बन्द या’ धइगु नारा च्वयातःगु प्लेकार्ड नं ब्वःगु खः । मनपां येँ लागाय् कवाडी व्यवसाय सञ्चालन मयाकेगु धासें थीथी थासय् च्वंगु कवाडी केन्द्रय् डोजर चले यायेवं व्यवसायीत आक्रोशित जूगु खः । म्हिगः प्रदर्शनया झ्वलय् यल, ख्वप व किपूया कवाडी व्यवसायीतय्स नं ब्वति काःगु खः ।
LEAVE YOUR COMMENTS