संसदय् दुहां वंपिं लघुवित्त पीडितयात कारवाही याइगु

येँ (नेपालभाषा टाइम्स)-निषेधित क्षेत्र त्वाःथलाः संघीय संसद दुने दुहां वंपिं लघुवित्त पीडिततय्त प्रहरीं मुद्दा तइगु जूगु दु । बानेश्वरस्थित संसद भवनय् म्हीग दुहां वंपिं ४८ म्ह मिसा व छम्ह मिजंयात प्रहरीं ज्वनातःगु दु । प्रहरीं अराजक गतिविधि याःपिंत मुद्दा तयेगु खँ धाःगु दु ।

येँया प्रहरी एसएसपी भूपेन्द्र खत्रीं अराजक ज्या यायेगु निंतिं उक्से याःपिं व अराजक गतिविधि याःपिंत म्हसीकाः उमिगु विरुद्ध मुलुकी अपराध संहिता–२०७४ कथं सार्वजनिक शान्ति सुरक्षा कसुरय् मुद्दा न्ह्याकेत्यंगु खः ।

घटना बारे छानबिन यायेत प्रहरी वरिष्ठ उपरीक्षक दिनेशराज मैनालीया नेतृत्वय् समिति नीस्वंगु खः। समितिया प्रतिवेदन कथं मुद्दा न्ह्याकेगु तयारी जुयाच्वंगु दु । उगु घटनाय् ज्वंपिंत न्हय्न्हु तक हिरासतय् तयेगु अनुमति जिल्ला प्रशासन कार्यालयं बीधुंकूगु दु ।

थ्वहे झ्वलय् मिटरब्याज विरुद्ध आन्दोलन यानाच्वंपिं पीडिततय्सं म्हिगः लाकां मन्ह्यासे पैदल मार्च याःगु दु । भृकुटी मण्डपय् च्वनाच्वंपिं पीडिततय्सं लाकां मन्ह्यासें पैदल यात्रा न्ह्याकाः भद्रकाली, शहिद गेट, लुँहिति जुयाः शान्तिवाटिकाय् कोणसभा याःगु खः ।

सरकारलिसे सहमति लिपा आन्दोलन स्थगित याःगु झिंन्हय्ला लिपा हे मिटरब्याज पीडिततय्सं हाकनं आन्दोलन न्ह्याकूगु खः । थ्व स्वयां न्ह्यः जूगु सहमतियात ‘धोका’ धासें पीडिततय्सं थीथी माग सहित आन्दोलन याःगु खः ।

मिटरब्याज पीडितत संसद भवनय् दुहां वंगु घटना लिपा प्रहरीं संसद भवन न्हू बानेश्वर व सिंहदरबारया फुटपाथय् न्यासि वनेगु तकं प्रतिबन्ध तःगु दु । संसद भवन न्ह्यःने व सिंहदरबार न्ह्यःने च्वंगु फुटपाथय् वये–वने मजिक आः खिपः हिनाः बार तया तःगु खः । फुटपाथं न्यासि वने मजीवं सर्वसाधारण मनूत धाःसा सतकं हे न्यासि वनेत बाध्य जूगु दु । उकथं हेम्हिगः संसद भवन व सिंहदरबारय् पिने न्हापा स्वयां अप्वः प्रहरी परिचालन याःगु दु ।

थ्वहे झ्वलय् सञ्चार मन्त्री रेखा शर्मां मिटरब्याज पीडितयात येँय् वयाः दुःख सीगु स्वयां जिल्ला प्रशासन ज्याकुथिइ वनेत सुझाव बियादीगु दु । वय्कलं मिटरब्याज पीडितया सम्बन्धय् सरकार संवेदनशील जूगु खँ नं धयादीगु दु ।

म्हिगः मन्त्रिपरिषद बैठकया निर्णय सार्वजनिक यासें मन्त्री शर्मां कानुन दयेकेगु लिसें शक्तिशाली आयोग दयेकाः मिटरब्याज समस्या सम्बोधन यायेगु कुतः जुयाच्वंगु खँ धयादीगु खः । पत्रकार सम्मेलनय् वय्कलं धयादिल, ‘पूर्ण रुपय् समाधान जुल धइगु मखु । गुलिखे कानुन अदालती प्रक्रियाय् थानाच्वंगु दु । गुलिखे समाधान याये ल्यं दनि ।’

सम्बन्धित बुखँ

LEAVE YOUR COMMENTS