नागढुंगाय् स्वनिगलय् दुहां वइपिनि भीड

येँ (नेपालभाषा टाइम्स) – लकडाउनया कारणं सुनसान जुयाच्वंगु स्वनिगलय् दुहां वयेगु मू नाका जुयाच्वंगु नागढुंगाय् सरकारं लकडाउन छ्वासुकेवं हाकनं भीडभाड अप्वया वःगु दु ।

सरकारं लकडाउनया मोडालिटी हीकेवं स्वनिगलय् दुहां वइपिनिगु ल्याः न्हियान्हिथं अप्वयाच्वंगु दु। स्वनिगलं पिने वनाच्वंपिं मनूत हाकनं स्वनिगलय् लिहां वयेगु क्रम अप्वया वयेवं नागढुंगा लागाय् न्हिथं ताःहाकःगु जाम नं जुइगु जुयावःगु दु। विशेष यानाः नागढुंगाय् निजी गाडी व मालवाहक गाडीया ताःहाकःगु झ्वः खनेदयेगु सुरु जूगु दु। स्थानीय प्रहरीया कथं नागढुंगा नाकां जक न्हिं स्वद्वलं मल्याक सवारी साधान वयेवने जुयाच्वंगु दु ।

सरकारं निजी यातायात सञ्चालन यायेगु निंतिं जोरविजोर प्रणाली लागू याःसां नं उकियात बेवास्ता यानाः यातायात साधन स्वनिगलय् दुहां वयाच्वंगु दु। स्वनिगलय् दुहां वयेन्ह्यः उमिगु स्वास्थ्य परीक्षण यायेमाःगु निर्देशन सरकारं बिउसां नं उकिया नं पालना धाःसा जुयाच्वंगु मदु। नागढुंगा नाकाय् च्वनाच्वंपिं प्रहरीं सामान्य थर्मल गनं ज्वरो नापे यायेगु बाहेक मेता ज्या याये फयाच्वंगु मदु ।

सरकारं स्वनिगलय् दुहां वयेन्ह्यः स्थानीय निकायया अनुमति माःगु व्यवस्था याःगु खःसां नं उकियात नं पालना यायेगु ज्या जुयाच्वंगु दु। सार्वजनिक यातायातं तकं स्थानीय निकायया अनुमति मकासे मनू ल्ह्ययेगु ज्या यानाच्वंगु दु ।

वंगु छुं न्हिं न्ह्यः जक स्वनिगःया नगरपालिका फोरमं स्वनिगलय् दुहां वयेगु लँ फुक्कं बन्द यायेमाःगु माग याःगु खः । फोरमया माग लिपा सरकारं स्थानीय निकायया स्वीकृति लिपा जक स्वनिगलय् दुहां वयेदइगु धाःसां नं विनाअनुमित स्वनिगलय् दुहां वयेगु क्रम धाःसा अप्वया हे वनाच्वंगु दु।

ट्राफिक प्रहरीया कथं वंगु असार १ गतेनिसें ७ गते तक जक २१८०० सवारी साधन स्वनिगलय् दुहां वःगु दु ।