इलामय् जुइगु उपनिर्वाचन पहिचानवादीया परीक्षा
येँ (नेपालभाषा टाइम्स- इलामया क्षेत्र नं. २ लय् आः जुइगु उपचुनाव अनया पहिचानवादीतय् लागिं समेत परीक्षाया विषय जुइगु अनुमान याना हःगु दु । एमालेया सांसद सुवास नेम्बाङ मदयाः खाली जूगु सिटय् थ्वहे वइगु वैशाख १५ गते उपचुनाव यायेगु घोषणा निर्वाचन आयोगं यायेधुंकूगु दु ।
आः जुइगु थ्व उपचुनावयात छखे राजनीतिक दलतय्सं थःपिनि लोकप्रियता जाँच यायेगु अवसर कथं काःगु दुसा मेखे अन आन्दोलन यानाच्वंपिं पहिचानवादीतय्सं थःपिनि पकड सिद्ध यायेगु अवसरया रुपय् कायेत्यंगु खँ सीदुगु दु ।
क्षेत्र नं. १ या नां ‘कोशी’ तःगु विरुद्ध अनया पहिचानवादी संस्थातय्सं लगातार आन्दोलन याना वयाच्वंगु दु । थ्व उपचुनावय् उमिसं पहिचानवादी शक्तिलिसे जानाः ब्वति कायेगु तयारी समेत यानाच्वंगु खँ धाःगु दु । चुनावय् थःपिनि उपस्थिति क्यनेगु लागिं आः पहिचानवादी शक्तित छथासं च्वनाः मंकाः उम्मेदवार थनेगु खः कि गुगुं पहिचानवादी पार्टीलिसे जानाः मोर्चा दयेकेगु धकाः सहलह जुयाच्वंगु खँ धाःगु दु ।
वंगु आमचुनावय् थ्व क्षेत्रय् गठबन्धनया उम्मेदवार डम्बर बहादुर खड्कां २९,९०६ मत हःगु खःसा एमालेया उम्मेदवार सुवास नेम्बाङ मुक्कं ११४ मत जक अप्वः कयाः विजयी जूगु खः । अबले थीथी पहिचानवादी दलतय्सं नं अलग अलग उम्मेदवारी बिउगु खःसा सकलें तसकं कम जक मत कयाः पराजित जूगु खः । उगु क्षेत्रय् आः एमालें नेम्बाङया हे काययात उम्मेदवार दयेकेगु तयारी यानाच्वंगु दुसा गठबन्धनं छुं निर्णय याःगु मदुनि ।
थ्वहे झ्वलय् निर्वाचन आयोगं उपनिर्वाचन घोषणाया लिसे मतदाता नामावली संकलनया ज्या स्थगित याःगु दु । वैशाख १५ गते इलाम लिसें बझाङ प्रदेशसभा–१ या उपनिर्वाचन जुइत्यंगु दु । आयोगया मतदाता निवमावली ऐन, २०७३ या दफा ४ या उपदफा (२) (२) कथं निर्वाचनया मिति घोषणा जुइधुंकाः उगु निर्वाचन प्रयोजनया नितिं मतदाता नामावलीइ नां दर्ता मजुइगु व्यवस्था दु ।
इलाम क्षेत्र–२ पाखें निर्वाचित तत्कालीन सांसद नेकपा एमालेया सुवास नेम्वाङ वंगु भदौ २६ गते मदुगु खः । अथे हे बझाङया प्रदेशसभा निर्वाचन क्षेत्र नम्बर १ नेपाली कांग्रेसया सांसद पृथ्वीबहादुर सिंह वंगु असार २५ गते गाडी दुर्घटनाय् लानाः मदुगु खः । वय्कःपिं मदयाः खाली जूगु सिटय् आः निर्वाचन यायेत्यंगु खः ।
LEAVE YOUR COMMENTS