ई पेमेन्टया निंतिं नेपाल क्लियरिङ्ग हाउस व सक्षम दथुइ सम्झौता

येँ – नेपाल क्लियरिङ्ग हाउस (एनसिएचएलं) युके एडया एक्सेस टु फाइनान्स (सक्षम) कार्यक्रम लिसे आईपीएस लिसे सहकार्यया निंतिं सम्झौता याःगु दु । एनसिएचएलं छगू ज्याझ्वः यासें सक्षमलिसे ई पेमेन्ट प्रणाली प्रर्वद्धन यायेग, नेशनल पेमेन्ट इन्टरफेस (एनपीआइ) लागू यायेगु व सेटलमेन्ट ग्यारेन्टी फण्ड (एसजीएफ) विस्तार यायेगु निंतिं सम्झौता जूगु जानकारी बिउगु दु ।

सम्झौताय् एनसीएसएलया प्रमुख कार्यकारी अधिकृत निलेशमान सिंह प्रधान व सक्षम पाखें टीम लिडर निर्मल दाहालं हस्ताक्षर याःगु खः । हस्ताक्षर ज्याझ्वलय् नेपाल राष्ट्र बैंकया कार्यकारी निर्देशक व मेमेपिं पदाधिकारीपिं लिसें थीथी वाणिज्य बैंक, विकास बैंक, वित्त कम्पनी संघया अध्यक्षपिं, डिएफआइडीया प्रतिनिधिपिनि उपस्थिति दुगु खँ धाःगु दु ।

थ्व परियोजनां देन्यंकं पिपुल टु पिपुल (पीटुपी), पिपुल टु गभर्मेन्ट (पीटुजि), गभर्मेन्ट टु पिपुल (जिटुपी) थेंज्याःगु कारोवारय् अप्वयेकाः डिजिटल अर्थतन्त्र दयेकेगु सरकारी योजनायात ग्वाहालि याइगु आशा यानातःगु दु ।

सक्षम (एक्सेस टु फाइनान्स प्रोग्राम) नेपाल व बेलायत सरकार दथुइ सम्झौता जूकथं युके एडया ग्वाहालिं संचालन जुयाच्वंगु कार्यक्रम खः । थ्व प्रोग्रामयात लुइस बर्जरं स्थानीय व अन्तर्राष्ट्रिय संस्थातलिसेया साझेदारीइ डिएफआइडीया निंतिं नेपालय् कार्यान्वयन यानाच्वंगु दु ।