विपद् व्यवस्थापनया निंतिं येँ महानगरपालिका तयार
येँ – येँ महानगरपालिकां विपद् व्यवस्थापनया निंतिं उद्धारकःमि तयार याइगु जूगु दु । येँ मनपां दक्वं वडाय् विपद्या ईया निंतिं उद्धार याइपिं उद्धारकःमि तयार यायेत्यंगु खः । महानगरपालिकाया प्रवक्ता ईश्वरमान डंगोलया कथं प्रत्येक छगू वडाय् पीम्ह स्वयमसेवक उद्धारकःमि तयार यायेगु तयारी जुयाच्वंगु दुसा उकिया निंतिं सम्बन्धित वडाय् तालिम नं संचालन याइगु जूगु दु ।
तालिम प्राप्त स्वयमसेवक उद्धारकःमियात व्यक्तिगत सुरक्षा सामग्री नं उपलब्ध याकी । घटनास्थलय् न्हापांगु प्रतिकार्य यायेगु निंतिं मनपां प्रत्येक वडाय् विपद् उद्धार व अग्नि नियन्त्रक स्वयम सेवक तयार यायेत्यंगु खः । मनपाया कथं आतकया महानगरया दक्वं वडाय् झिंप्यम्हेसिया विपद् व्यवस्थापन व नागरिक सुरक्षा समिति गठन जुइधुंकूगु दु ।
थ्व समितिइ ३३ गू प्रतिशत मिसातय् अनिवार्य प्रतिनिधित्व जुइमाःगु प्रवक्ता डंगोलं कनादिल । प्रवक्ता डंगोलया कथं विपद् व्यवस्थापन समितिं हे स्वयम सेवक तयार यायेगु ज्या याइ । छगू वडाय् पीम्हेसिया ल्याखं महानगरया दक्वं वडाय् कुल १,२८० महानगर दुनेया विपद् व्यवस्थापनय् तत्काल खटे जुइत दक्ष उद्धारकःमि तयार यायेगु ज्या न्ह्याः वनाच्वंगु धासें प्रवक्ता डंगोलं थ्व जनशक्तिं विपद्या पूर्व तयारी यायेगु नापं प्रतिकार्यया नं ज्या याइ धयादीगु दु ।
थ्व हे झ्वलय् महानगरं विपद्या पूर्वतयारी व तत्काल राहत उद्धारया ज्या यायेत महानगर आपतकालीन कार्य संचालन केन्द्र स्थापना यानाः संचालनय् हयेधुंकूगु दु । आतकया दुने २० गू वडाया पदाधिकारीयात तालिम बीगु ज्या जुइधुंकूगु दु ।
LEAVE YOUR COMMENTS