येँ व यलय् खबरदारी सभा
१४ गते तःजिक मोटरसाइकल ¥याली
येँ – गुथि विधेयक विरुद्ध जुयाच्वंगु आन्दोलनया झ्वलय् म्हिगः थनया न्हूसतकय् सरकारयात खबरदारी याये कथं जुलुस पिहां वःगु दु । न्हू सतकं न्ह्याःगु जुलुस वीर अस्पताल, रत्नपार्क, लुँमधी, खिचापुखू, ओमबहा, यंगाः चिकंमू जुयाः मरुया महाद्यः पार्वती देगः न्ह्यःने वयाः सभाय् हिउगु खः ।
बिना शिख्राकारं लसकुस यानाः न्ह्याःगु सभाय् नेवाः देय् दबूया नायः नरेश ताम्रकारं सम्बोधन यासें गुथि विधेयक लित कायेगु मखु खारेज यायेमाःगु माग यानादीगु दु । वय्कलं गुथि विधेयक खारेज मजूतले न्ह्यानाच्वंगु आन्दोलन दीमखु धासें सरकारं याकनं हे विधेयक खारेज यायेमाःगु माग यानादिल ।
लिसें वय्कलं गुथि विधेयकयात कयाः जुयाच्वंगु आन्दोलनया बारे मखुगु खँ न्ववाःपिं मन्त्रीतय्सं राजीनामा बीमाःगु माग नं यानादीगु दु ।
सरकारं गुथि विधेयक लित कायेधुंकूगु जूसां नं गुगुं नं इलय् विधेयक हाकनं वयेफु धासें निरन्तर खबरदारी यायेगु निंतिं म्हिगः नं जुलुस पिहां वःगु खः ।
जुलुसय् ‘गुथि विधेयक खारेज याः, सम्पदा म्हासे याये दइ मखु, गुथि विधेयक लित कायेवं आदिवासी नेवाःतय् समस्या ज्यनी मखु’ धकाः च्वयातःगु प्लेकार्ड ब्वया वःगु खः । अथे हे म्हिगः यलय् नं गुथि विधेयकयात कयाः जुलुस पिहां वःगु दु । गुथि विधेयक खारेज यायेमाःगु माग यासें म्हिगः मंगलं जुलुस पिहां वःगु खः ।
गुथि विधेयक विरुद्ध सरकारयात खबरदारी यायेगु लागिं आः हानं निरन्तर विरोधया ज्याझ्वः याना वनेगु निर्णय संघर्ष समितिं याःगु खः । थ्वहे झ्वलय् असार १४ गते येँनं छगू मोटरसाइकल ¥याली पिकयाः स्वनिगः चाःहिलेगु ज्याझ्वः दयेकूगु दु ।
थ्वहे झ्वलय् गुथि विधेयक विरोधय् पिने देशय् नं विरोध शुरु जूगु दु । अमेरिकाया न्यूयोर्क व वाशिंगटनय् च्वंपिं नेवाःतय्सं नं अन गुथि विधेयक विरुद्ध प्रदर्शन याःगु दु । अन च्वंपिं नेवाःतय्सं नं थीथी नारा च्वयातःगु ब्यानर ब्वयाः सतकय् हे प्रदर्शन याः वःगु खः ।
LEAVE YOUR COMMENTS