कान्तिया फोहोर मुनेगु बन्द

येँ (नेपालभाषा टाइम्स)÷येँ महानगरपालिकां मेगु व्यवस्था मजूतले कान्ति बाल अस्पतालया फोहोर उठे मयाइगु जूगु दु । महानगरपालिकाया उपमेयर लिसें अनुगमन समितिया संयोजक सुनिता डंगोलया नेतृत्वय् म्हिगः वंगु पुचलं अस्पतालया फोहोरया वर्गीकरण व ढुवानीइ कमजोरी खने दयेवं अस्पतालयात फोहोर उठे मयायेगु जानकारी याकूगु खः ।
उपमेयर डंगोलं थःत नमूना जुयाः क्यनेमाःगु अस्पतालं हे कमजोरी क्यंगु खँ धयादीगु दु । वय्कलं अस्पतालं फोहोर तयेत बाल्टिन तयातःसां वहे छगः बाल्टिनय् फुक्क कथंया फोहोर वायेगु यानाच्वंगु लूगु खँ धयादीगु दु । अस्पतालं यानाच्वंगु ज्या गलत जूगु धासें वासः याइगु केन्द्र हे ल्वय् उत्पादन जुइगु थाय् जुइगु उचित मजूगु खँ धयादीगु दु ।
अस्पतालं हानीकारक फोहोर निर्मूलीकरण यायेगु नितिं उपकरण जडान यानातःगु दुसां नं उकियात प्रभावकारी रुपय् उपयोग मयाःगुलिं स्रोतय् हे वर्गीकरण यायेत नं अस्पतालयात सुझाव बियादीगु दु ।