आशा सफूकुथियात उत्कृष्ट पुस्तकालय सम्मान

येँ (नेपालभाषा टाइम्स)- आशा सफूकुथियात थुगु दँयात उत्कृष्ट पुस्त– कालय सम्मान लःल्हाःगु दु । म्हिगः झिंखुक्वःगु पुस्तकालय दिवसया लसताय् जूगु छगू ज्याझ्वलय् शिक्षा मन्त्री अशोक राईं उगु सम्मान लःल्हानादीगु खः । थुगु सम्मान दँय्दसं नेपाल सरकारं हे लःल्हायेगु याना वयाच्वंगु खः ।

थ्वहे झ्वलय् नेपाल सरकारं उत्कृष्ट घोषणा याःगु पुस्तकालययात येँया रत्न पुस्तकालयपाखें ५०,००० (न्यय्द्वः) तकाया सिरपाः बीगु ग्वसाः कथं म्हिगः आशा सफूकुथियात उगु न्यय्द्वः तका दां नं लःल्हाःगु खः । थ्व दां सिरपाः बीगु व्यवस्था थ्वहे दँनिसें तिनि शुरु जूगु खः ।

म्हिगः शिक्षा मन्त्रालयय् जूगु ज्याझ्वलय् आशा सफूकुथि गुथिया उपाध्यक्ष काशिनाथ तमोटं उगु सिरपाः व सम्मान लःल्हानाः कयादीगु खः ।
आशा सफूकुथि नेपालय् जनस्तरं पलिस्था यानातःगु छगूया छगू जक अभिलेखाय (आर्काइभ) खः । भाषानिभाः प्रेमबहादुर कसाःजुं थः अबु आशामान कसाःया नामं थ्व सफूकुथि पलिस्था यानादीगु खः । थन द्वलंद्वःदँ पुलांगु आपालं ल्हातं च्वयातःगु सफू, थ्यासफू, ताडपत्र लिसें आपालं अमूल्य ग्रन्थत मुंकातःगु दु ।

पुस्तकालय दिवसया उगु ज्याझ्वलय् भोला श्रेष्ठयात उत्कृष्ट पुस्तकालय कर्मचारी सिरपाः ८३ दँ दुम्ह छम्ह वृद्धायात उत्कृष्ट पाठकया सिरपालं छाय्पीगु ज्या नं जूगु खः ।