लुँहितिं लः हायेकेगु तयारी

येँ – येँ महानगरपालिकाया आह्वनयात स्वीकार यासें थःथःपिनि चःबि खुल्ला याना बिउपिं रेष्टुरेन्टतय्त छुं नं कथंया कर छुट मबीगु खँ मनपां धाःगु दु । म्हिगः च्वंगु बोर्ड बैठकय् न्ववासें मेयर बालेन साहं चःबि खुल्ला यायेगु ज्या उमिसं स्वतःस्फुर्त रुपं याःगु जूगुलिं कर छुट मखु बरु सफाइ सामग्री उपलब्ध याकेगु खँ कनादीगु खः ।

लिसें बैठकं थ्वहे वइगु असार ५ गते नगरसभाया ११ क्वःगु व थुगु कार्यकालया न्हापांगु बैठक च्वनेगु प्रस्ताव नं पारित याःगु दु । येँया राष्ट्रिय सभागृहय् उगु बैठक च्वनी ।

बैठकय् येँय् ताः ई न्ह्यवंनिसें जुयाच्वंगु फोहोरया समस्या समाधान जूगु खँय् नं चर्चा जूगु खः । लिसें आः विद्युत प्राधिकरणं छुं ईया दुने हे येँय् तार भूमिगत यायेगु ज्या क्वचायेकीगु जानकारी नं मेयर साहं बैठकय् यानादीगु खः । उगु हे बैठकय् २२ वडाया अध्यक्ष चिनीकाजी महर्जनं मेयर साह २२ वडाया लुँहितिया निरीक्षणय् वःबलय् थःपिंत जानकारी मबिउगु खँय् ध्यानाकर्षण यानादीगु खःसा मेयर साहं लिपांनिसें जानकारी बियाः वयेगु खँ कनादिल । मेयर साहं बन्द जुयाच्वंगु लुँहिति चायेकाः अन लः हायेकेगु लागिं पहल यायेगु खँ कनादीगु खः ।

लुँहितिं लः हाःसां लः पिहां वनीगु निकास मदुगु व आः दयेकाच्वंगु धरहरां यानाः अन निकास समेत बन्द जुइधुंकूगु कारणं निकासया लागिं मेगु हे व्यवस्था याये मालीगु खँ वयाच्वंगु खः ।

उकुन्हु थें म्हिगःया कार्यपालिका बैठक नं आमसञ्चारय् प्रत्यक्ष प्रशारण याःगु खः ।

सम्बन्धित बुखँ

LEAVE YOUR COMMENTS