एमालेय् भण्डारीया नं गुट !
येँ (नेपालभाषा टाइम्स)÷पुलांम्ह राष्ट्रपति विद्यादेवी भण्डारीं थः हानं एमालेय् दुहां वनाः सक्रिय राजनीति यायेत तयारी शुरु यानादीगु खँ सीदुगु दु । थुकिया लागिं वय्कलं पार्टी दुने थःगु नं गुट दयेकेगु तयारी याना हःगु खँ नं सूत्रं धाःगु दु ।
भण्डारीयात एमालेय् दुहां वयाः नेतृत्व कःघायेगु लागिं वर्तमान अध्यक्ष केपी ओलीपाखें नं सकारात्मक संकेत बियाहःगु सूत्रया दावी दु । खतुं विद्या भण्डारी शितल निवासं पिहां वयेधुंकाः एमाले अध्यक्ष केपी ओली वय्कःया छेँय् वनाः नापलाःगु वा वय्कः ओलीया छेँय् वनाः खँल्हाबल्हा याः वंगु औपचारिक समाचार गनं वःगु मदुनि ।
भण्डारीयात पार्टीइ हयाः नेतृत्व बीगु ओलीया इच्छा खःसा आः उकी स्वयम् भण्डारीं नं रुचि क्यना हःगु सूत्रया दावी दु । भण्डारीं आः रुचि क्यनेगु जक मखु, उकिया लागिं वातावरण दयेकेगु ज्या नं शुरु याना हःगु दु । थुकिया लागिं वय्कलं पार्टी दुने थःत समर्थन याइपिं नेतातय्त सःताः न्यनेकने यायेगु व थःगु पक्षय् न्ववाकेगु ज्या याना हःगु दु ।
सूत्रतय्सं धाः कथं विद्या भण्डारी पार्टीया नेतृत्वय् वयेगु लागिं थः इच्छुक जूसां एमालेया निगूगु पुस्ताया नेतातय्सं धाःसा थुकियात ययेकाच्वंगु मदु । यदि भण्डारी पार्टी नेतृत्वय् वल धाःसा थःपिनि पाः वइ मखु धइगु तायेकाः उमिसं भण्डारीया ‘कमब्याक’यात यः मतायेकूगु खः ।
एमाले दुने थौंकन्हय् ओली लिपाया शीर्ष नेता सु धइगु न्ह्यसः पिहां वयाच्वंगु दु । एमालेय् थौंकन्हय् ओली ज्वःम्ह व ओली थें सर्वग्राह्य नेता पिहां वये फयाच्वंगु मदुनि । निगूगु पुस्ता धकाः न्ह्यःने वयाच्वंपिं ईश्वर पोखरेल, शंकर पोखरेल, बिष्णु पौडेल व सुभाष नेम्बाङपिं थवंथवय् हे मेल मदुसा कार्यकर्ता तहलय् नं वय्कःपिनि खास पकड मदु । ओली लिपा थ्व पुस्तायात कार्यकर्तां स्वीकार याये थाकुइगु खने दुगुलिं ओलीं हे विद्या भण्डारीयात पार्टी नेतृत्वय् हयेत सनाच्वंगु सूत्रया दावी दु ।
राष्ट्रपति जुयाः अन्तर्राष्ट्रिय छबी दयेकेधुंकूम्ह जूगुलिं भण्डारी जुल धाःसा कार्यकर्तां स्वीकार याइगु व पार्टीया उचाइ नं थहां वनीगु विश्लेषण ओली पक्षं यानाच्वंगु दु । तर स्वयम् ओली गुटया हे मेगु खेमां धाःसा भण्डारीयाके ‘पूर्व राष्ट्रपति’ धइगु छगू छबी बाहेक विचार वा संगठन क्षमता मदुगु जूगुलिं वय्कः नेतृत्वय् वल धाःसा एमाले झन् विभाजित जुइ फइगु विश्लेषण न्ह्यब्वयाच्वंगु खँ नं सूत्रं धाःगु दु ।
LEAVE YOUR COMMENTS