न्याय फ्वँसें स्थानीयवासीया प्रदर्शन

यल । यलया स्थानीय निवासी सजिलमान शाक्ययात न्याय बीमाःगु माग यासें थौं यलया लगंख्यलय् स्थानीय थीथी जातीय खलः पुचःतय्सं शान्तिपूर्ण प्रदर्शन यात । यलया ज्यापु समाज लिसें शाक्य वज्राचार्य व मेमेगु जातीय समाजलिसे सम्बन्धित खलः पुचःतय्सं यलया मंगलय् प्रदर्शन याःगु खः ।
मंगलय् जूगु उगु ¥यालीइ ब्वति कायेत येँपाखें नं आपालं स्थानीय मनूत यल ध्वाखाय् मुनाः सहभागी जूगु खः । मंगलंनिसें शुरु जूगु उगु प्रदर्शनं यलया सिडिओ ज्याकुथिइ वनाः ज्ञापनपत्र बिउ वंगु खः ।
ज्ञापनपत्रय् घाःपाः जूम्ह सजिलमान शाक्ययात क्षतिपूर्ति बीमाःगु व दुर्घटना जूगु होटलयात कारवाही यायेमाःगु माग न्ह्यथनातःगु दु ।
वयां लिपा न्ह्याः वंगु प्रदर्शन पूच्वया होटल स्क्वायर न्ह्यःने थ्यंकाः क्वचाःगु खः । अन जूगु समापन ज्याझ्वलय् घाःपाः जूम्ह सजिलमान शाक्यया जहान लिसें अबुं सम्बोधन यासें उगु घटनायात कयाः प्रहरीइ निवेदन दर्ता याः वनाः नं न्याला तक दर्ता मयाःगु व जनदबाब वयेवं दर्ता याःगु खँ कनादिल ।
जनदबाब लिपा होटल स्क्वायरया सञ्चालकयात ज्वंगु खःसां वयात म्याद थपे मयाकेगु लागिं जक देय्या आपालं वरिष्ठ अधिवक्तातय्सं वहस यानाः अदालतयात हे प्रभावित यायेत स्वःगु खँ नं वय्कःपिंसं कनादिल ।
थनिं न्याला न्ह्यः पूच्वया होटल स्क्वायर दुने च्वंगु स्वीमिङ पुलय् स्वीमिङ याः वंगु इलय् करेन्टं ज्वनाः शाक्य घाःपाः जूगु खः । शाक्य आः तक नं कोमाय् लानाच्वंगु दुसा वय्कःया उपचारय् छेँजःपिंसं आपालं खर्च यायेधुंकूगु खँ धाःगु दु ।
शान्तिपूर्ण प्रदर्शन लिपा प्रदर्शनकारीतय्सं सांकेतिक रुपं जूसां होटल स्क्वायरय् घौछिया लागिं तालं ग्वयेगु कुतः याःगु खः । तर प्रहरीं तालं ग्वयेके मबिल । आक्रोशित जूपिं प्रदर्शनकारीतय्सं थौं तालं ग्वयेके मबिउसां यदि शाक्ययात इलय् न्याय मबिल धाःसा थःपिंसं होटेलय् तालाबन्दी यायेगु कार्यक्रम हये माली धकाः ख्याच्वः बियाथकूगु दु ।
थ्वहे झ्वलय् थौं वृहत् दबाबमूलक प्रदर्शन याइगु जुइवं म्हिगः होटल स्क्वायरया सञ्चालक रोमी अर्यालयात म्हिगः बहनी प्रहरीं ज्वंगु दु ।