चीन–नेपाः स्वापुती भारत सशंकित

येँ – भारतया पुलांम्ह विदेशी सचिव श्यामशरणं नेपाःलिसे चीनं कम्युनिष्ट पार्टीया परिवार थेंज्याःगु व्यवहार यानाच्वंगु बिचाः तयादीगु दु । भारतया ‘दि प्रिन्ट अनलाइन’लिसे खँ ल्हासें शरणं उगु खँ धयादीगु खः ।

नेपाःया निंतिं पुलांम्ह राजदूत समेत जुयादीम्ह शरणं नेपालय् अप्वया वनाच्वंगु चिनियाँ कम्युनिष्ट पार्टीया गतिविधियात भारतं होसियारीपूर्वक स्वयेमाःगु बिचाः नं न्ह्यःने तयादीगु दु । वय्कलं न्ह्यःने धयादी, ‘नेपाःया राजनीतिक घटनाक्रमय् हस्तक्षेप यायेत चीनं पार्टीया डेलिगेशन छ्वल । चीनं नेपाःलिसे कम्युनिष्ट पार्टीया परिवारलिसे डिल याये थें यानाः कम्युनिष्ट पार्टीया लियाजों विभागं छगू टिम नेपाः छ्वल ।’ तर थुखेपाखे सुनां नं ध्यान मबिउ धासें वय्कलं चीनं नेपाःलिसे राज्य–राज्य दथुइ थेंज्याःगु व्यवहार यायेमाःगु खँ नं धयादीगु दु ।

वय्कलं नेपाःलिसे चीनं पार्टी–पार्टीया स्वापू दु धइगु कथं सम्बन्ध स्थापित यायेत स्वयाच्वंगु खँ न्ह्यथँसें थ्व भारतया लागिं बांलाःगु संकेत मखु धयादीगु दु । चीनं मेगु देय्तलिसे राज्य–राज्य तहलय् सामान्य सम्बन्ध कायम यायेत चाहे जुइगु याःसां नेपाःलिसे धाःसा व स्वयां बिस्कं कथं सम्बन्ध क्यनेत चाहे जुयाच्वंगु खँ न्ह्यथँसें शरणं उकियात भारतं सतिक च्वनाः स्वयेमाःगु बिचाः नं तयादीगु दु ।

वय्कलं नेपाःया लिपांगु राजनीतिक अवस्था तसकं तरल स्थितिइ लाः वंगु व थुकी भारत सम्बन्धी नेपाःया नीति समेत छुं हद तक दुविधाय् लाःवंगु खँ नं धयादीगु दु । लिपांगु इलय् नेपालय् राजतन्त्रवादी व हिन्दूवादीतय्सं थःपिनि गतिविधि अप्वयेका यंकाच्वंगु खँ नं शरणं विशेष रुपं न्ह्यथनादीगु दु ।

वय्कलं धयादी, ‘राजतन्त्र पक्षधर भावना लिपांगु इलय् छुं हद तक अप्वया वनाच्वंगु दु । छुं ई न्ह्यः नेपालय् राजतन्त्र लित हयेगु निंतिं राजधानी येँय् तःधंगु प्रदर्शन नं जूगु दु ।’ नेपाःया थ्व अवस्था प्रति भारतया छु बिचाः दु व गज्याःगु बिचाः तयेमाः धइगु खँ धाःसा वय्कलं उल्लेख यानामदी ।

अथे खःसां वय्कःया थ्व धापुतिं नेपालय् जुयाच्वंगु राजतन्त्र पक्षधर प्रदर्शनयात भारतं नजरअन्दाज याःगु मदु धइगु संकेत बिउगु खँ थनया राजनीतिक वृत्तं धयाहःगु दु ।

सम्बन्धित बुखँ

LEAVE YOUR COMMENTS