निगूलिं अध्यादेश लितकायेगु सरकारया निर्णय
येँ – सरकारं जारी याःगु दल विभाजन व संवैधानिक परिषद् सम्बन्धि निगूलिं अध्यादेश लितकायेगु निर्णय याःगु दु ।
अध्यादेशया बारे सत्तारुढ नेकपा दुने व विपक्षीतय्सं विरोध यायेवं शुक्रवाः बालुवाटारय् च्वंगु मन्त्रिपरिषदया मुँज्यां निगूलिं अध्यादेश लितकायेगु निर्णय याःगु खः । बिहीवाः जक नेकपाया सचिवालयय् दुथ्याःपिं खुम्ह नेतातय् मुँज्या च्वनाः अध्यादेश लितकायेत इनाप याःगु खः । नेकपाया उपाध्यक्ष बामदेव गाैतमया भैंसिपाटीस्थित छेँय् च्वंगु मुँज्यां शुक्रवाः अध्यादेश लितमकाःसा शनिवाः स्थायी कमिटीया मुँज्या सःतेगु खँ धाःगु खः ।
थ्वस्वयां न्हापा स्थायी कमिटीया नीम्ह दुजःतय्सं मुँज्या सःता अध्यादेशया बारे सहलह यायेत नेकपाया निम्हं अध्यक्षयात पाै च्वःगु खः ।
सरकारं वैशाख ८ गते राजनीतिक दल विभाजन व संवैधानिक परिषद सम्बिन्धी अध्यादेश जारी याःगु खः । सरकारं अध्यादेश जारी याःगु छुं ई लिपा हे राष्ट्रपतिपाखें प्रमाणित जुयाः राजपत्रय् तं प्रकाशित याःगु खः ।
सरकारं संसदीय दल वा केन्द्रीय समिति मध्ये छगूलि जक ४० प्रतिशत बहुमत दुसां पार्टी विभाजन यायेफइगु कथंया अध्यादेश हःगु खः । अथेहे संवैधानिक परिषद सम्बन्धी अध्यादेशय् विपक्ष दलया नेताया अनुस्थितिइ हे परिषदया मुँज्या च्वनाः निर्णय यायेफइगु कथंया व्यवस्था दुगु अध्यादेश हःगु खः ।
LEAVE YOUR COMMENTS