गंकी धुस्वां–वसुन्धरा सिरपाः लःल्हात
येँ (नेपालभाषा टाइम्स)- गंकी धुस्वां–वसुन्धरा प्रतिष्ठानपाखें थुगुसीया ‘गंकी धुस्वां–वसुन्धरा पुरस्कार’ व ‘धुस्वां साय्मि सिर्जना पुरस्कार’ वंगु घ्यःचाकु संल्हू कुन्हु छगू ज्याझ्वःया दथुइ लःल्हात । नेपाल प्रज्ञा प्रतिष्ठानया सभाकक्षय् प्रतिष्ठानया नायः प्रा.डा. अरुण साय्मिया सभापतित्वय् उगु ज्याझ्वः जूगु खः ।
नेपालभाषाया न्हापांम्ह उपन्यासकार लिसें उपन्याससम्राट धुस्वां साय्मि, वय्कःया जहान वसुन्धरा साय्मि, तःधिकःम्ह काय दीपक मानन्धर व छन्हु न्ह्यः जक मदुम्ह जनगायक भृगुराम श्रेष्ठलिसें मेपिं साहित्यकारप्रति श्रद्धाञ्जली देछायेकथं छगू मिनेट मौन धारण यासें ज्याझ्वः न्ह्याःगु खः ।
प्रतिष्ठानया अध्यक्ष प्रा. डा. अरुण साय्मिया लसकुस न्वचुपाखें न्ह्याःगु ज्याझ्वःया उलेज्या मूपाहां जनकवि दुर्गालाल श्रेष्ठं त्वाःदेवाय् मत च्याकाः यानादीगु खः । उलेज्या
लिपा मूपाहां, पाहां, पुरस्कृत व्यक्ति, छेँजःपिं सकसिनं उपन्याससम्राट साय्मि, वय्कःया जहान व कायया किपाय् स्वां देछानादीगु खः ।
ज्याझ्वलय् उपन्यास विधाय् बीगु ‘गंकी धुस्वां–वसुन्धरा पुरस्कार’ थुगुसी थारू भासं उपन्यास च्वयादीम्ह उपन्यासकार डा. कृष्णराज सर्वहारी व ‘धुस्वां साय्मि सिर्जना पुरस्कार’ नेपालभाषालिसें खय् भायया वरिष्ठ गायक व संगीतकार योगेश वैद्ययात लःल्हाःगु खः । पुरस्कृत व्यक्तित्वयात प्रतिष्ठानया नायः प्रा.डा. साय्मिं स्वांम्हू, मूपाहां जनकवि श्रेष्ठं दोसल्ला न्ययेकाः हनापौ लःल्हानादीगु खःसा प्रतिष्ठानया संरक्षक प्रा.डा. प्रकाश साय्मिं दां लःल्हानादीगु खः । निगुलिं सिरपाः न्यय्द्वः तका दांया खः ।
उगु इलय् पुरस्कृत व्यक्तित्व उपन्यासकार सर्वहारीया म्हसीका प्रतिष्ठानया दुजः विमल भौकाजी व वरिष्ठ गायक, संगीतकार वैद्यया म्हसीका वरिष्ठ नाट्यकर्मि हरिहर शर्मां बियादीगु खः । ज्याझ्वः प्रतिष्ठानया छ्याञ्जे कवयित्री प्रतिसरा सायमिं न्ह्याकादीगु खःसा गायिका रीता महर्जनं म्येँ न्यंकादीगु खः ।
ज्याझ्वलय् स्वास्थ्यया कारणं उपस्थित जुयादी मफुम्ह वरिष्ठ गायक योगेश वैद्यया भिडियो सन्देश न्यंकेगु ज्या जूगु खः । सन्देशय् थःगु मन्तव्य बीगु झ्वलय् गायक वैद्यं थः स्वास्थ्यया कारणं सक्रिय जुइ मफुसां थःगु योगदानयात लुमंकूगुलिं प्रतिष्ठानयात सुभाय् बियादिल ।अथे हे मेम्ह सिरपाः त्याकादीम्ह उपन्यासकार सर्वहारीं देय्या थीथी भाषाया साहित्य थकायेगु लागिं राज्यं यायेमाःगु ज्या थौं निजीस्तरं नीस्वनातःगु संस्थां याःगु धासें लसता प्वंकादिल ।
प्रतिष्ठानपाखें हरेक निदँय् छक्वः थ्व सिरपाः बीगु याना वयाच्वंगु दु ।
LEAVE YOUR COMMENTS