सशस्त्र प्रहरी बलया भविष्य मखनाः धमाधम राजीनामा

येँ – माओवादी जनयुद्ध दमन यायेगु लागिं गठन याःगु अर्धसैनिक बल सशस्त्र प्रहरीइ थौंकन्हय् राजीनामा बीपिं अप्वया वःगु दु । वंगु स्वलाया दुने जक सशस्त्र प्रहरी बलं राजीनामा बियाः वंपिं प्रहरीतय् ल्याः ७८६ म्ह थ्यंगु दु । थुकी सईनिसें कयाः कार्यालय सहयोगी तकया पदय् ज्या याइपिं अप्वः दु ।

राजीनामा बिया वंपिं मध्ये नं वंगु असार महिनाय् राजीनामा बिउपिनि ल्याः व स्वयां न्ह्यःया निलाया दुने राजीनामा बिउपिं स्वयां अप्वः दु । वंगु असार लछिया दुने जक छम्ह इन्स्पेक्टर सहित ५२६ म्हेस्यां राजीनामा बिया वंगु खः ।

सशस्त्र प्रहरी बल दुने थथे छक्वलं राजीनामा बीपिं न्हापा गबलें नं अप्वःगु मदु । थुकियात कयाः बल दुने चिन्ता समेत व्यक्त जुया वःगु खँ सूत्रं धाःगु दु ।
खास यानाः फोर्स दुने ताः ई तक नं बढुवा मजूगु, आवश्यक सुविधा बढे मयाःगु आदि मू कारक जूगु खँ धाःगु दु । यदि राजीनामा बीगु थ्व क्रमयात पनेगु खःसा ताः ई निसें रोके जुयाच्वंगु बढुवा प्रक्रियायात तुरुन्त न्ह्याके माःगु खँ अनया अधिकृततय्सं धाःगु दु ।

जनयुद्ध पनेगु लागिं गठन याःगु थ्व प्रहरी बलया आवश्यकतायात कयाः नं लिपांगु इलय् आपालं वहस जुयाच्वंगु दु । जनयुद्ध बन्द जुइधुंकाः थ्व बल आवश्यक खः लाकि मखु धइगु न्ह्यसः पिहां वःगु खः । अथे खःसां सरकारं सशस्त्र प्रहरीयात नेपाःया सीमा लागाय् खटे यानाः तस्करी पनेगु ज्या यानाच्वंगु खःसां लिपांगु इलय् सशस्त्र प्रहरी बलया अधिकार लागा तःचाः याना यंकूगु खः । थुकियात तस्करी जक मखु सीमाय् सुरक्षा बीगु व छुं भचा नेपाल प्रहरीयात थेंज्याःगु हे अधिकार बीगु ज्या समेत जूगु खः । नेपाल प्रहरी व सशस्त्र प्रहरी दथुइ अधिकार क्षेत्रयात कयाः इलय् ब्यलय् विवाद पिहां वयेगु याः ।