सहकारी ठगीइ रवि विरुद्ध उजुरी

येँ (नेपालभाषा टाइम्स)- नेपाल विद्यार्थी संघं सहकारी घोटाला बारे जाँच यायेत व दोषीयात कडा कारबाही माग यासें सहकारी विभाग उजुरी बिउगु दु । नेवि संघं राष्ट्रिय स्वतन्त्र पार्टीया सभापति रवि लामिछाने विरुद्ध कारबाही माग यासें उजुरी बिउगु खः ।

नेवि संघं सहकारी विभागय् उजुरी दर्ता यायेगु लिसें थीथी नारा थ्वयेकाः प्रदर्शन नं याःगु दु । नेवि संघं सरकारी घोटालाया कारणं नेपाःया आर्थिक, सामाजिक व राजनीतिक विकासय् गम्भीर लिच्वः लाःगु खँ धाःगु दु ।

थ्व स्वयां न्ह्यः युवराज सफलं सहकारी ठगी प्रकरणय् गोरखा मिडिया नेटवर्कया अध्यक्ष जिबी राई व तत्कालीन एमडी रवि लामिछाने विरुद्ध सरकारी विभागय् उजुरी दर्ता याःगु खः । सहकारी ठगी प्रकरणय् राई व लामिछाने नं संलग्न जूवंगु धासें माःगु छानविन व कारबाही यायेत माग याःगु खः ।