ने. सं. ११४४ कौलाथ्व चौथी -

उमेरय् झंगः लाःम्ह उपरथी पाण्डेया राजीनामा

येँ (नेपाल भाष टाइम्स)- नेपाली सेनाया भावी प्रधान सेनापति जुइम्ह धकाः न्ह्यःने हयातःम्ह उपरथी ताराध्वज पाण्डें अन्ततः राजीनामा बियाः थ्व विवाद क्वचायेकादीगु दु ।
पाण्डें थःगु सर्टिफिकेटय् जन्म मिति केरमेट यानाः उमेर सच्चे याना तःगु लुइवं वय्कःया बढुवा विवादय् लाःगु खः । विवादया दथुइ वय्कलं प्रधान सेनापति प्रभुराम शर्मायात बियादीगु राजीनामा स्वीकृत नं जूगु दु ।

पाण्डें परीक्षा नियन्त्रण कार्यालयया ढड्डाय् केरमेट यानाः थःगु उमेर सच्चे यानातःगु खः । अन न्हापा वय्कःया जन्म मिति २०२१ जुयाच्वंगु खःसा वय्कलं लिपा उकियात केरमेट यानाः उमेर जन्म मिति २०२३ यानातःगु खः । थ्व उमेर सच्चे यायेगु ज्या गबले व छु प्रयोजनया लागिं याःगु धइगु खँ सीमदुनि ।

केरमेट यानाः उमेर सच्चे याना तःथाय् सुयां हस्तक्षर वा छाप नं तयातःगु मदु । उकिं थ्व केरमेट यायेगु ज्या नं छगू कथंया अपराध जुइ फइगु खँ धाःगु दु । परीक्षा नियन्त्रण कार्यालयया गोप्य ढड्डाय् अथे केरमेट यायेगु ज्या कानुनी रुपं अपराध जूगु कारणं थुकिया बारे नं छानबिन यानाः दोषीयात कारवाही यायेमाःगु माग जूगु दु ।

पाण्डें थःगु जन्ममिति बारे अडान कायेवं वय्कःया विरुद्ध कोर्ट मार्शल समेत जुइफु धकाः ख्याच्वः वयेवं वय्कलं बाध्य जुयाः राजीनामा बियादीगु खः । वय्कलं उमेर केरमेट यानाः झंगः ज्या यानादीगु खँ सञ्चार माध्यमय् वयेवं सेनापाखें हे छानबिन यायेगु ज्या जूगु खः । थुकियात कयाः अख्तियार दुरुपयोगय् समेत उजुरी लाःगु खः । सेनाया छानबिनय् वय्कः दोषी खने दयेवं वय्कःयात ख्याच्वः वंगु खःसा वय्कलं राजीनामा बियादीगु खः ।

वय्कःया थ्व प्रकरणं यानाः रक्षा मन्त्री पूर्णबहादुर खड्का लिसें प्रधान सेना प्रभुराम शर्माया नां समेत विवादय् लाः वःगु खः ।