रवियात मन्त्री मदयेके मजिउगु सुझाव
येँ (नेपालभाषा टाइम्स)÷गृहमन्त्री सुयात यायेगु धइगु बारे सत्ता गठबन्धन दथुइ कचवं पिहां वइगु सम्भावना ब्वलंगु दु । रास्वपा अध्यक्ष रवि लामिछानेया सांसद पद खारेज जुइवं गृहमन्त्री सुनां कायेगु धइगु विवाद ब्वलंगु खः ।
रास्वपां लामिछाने पदमुक्त जुइधुंकूसां गृहमन्त्री थःपिंत हे माः धकाः दाबी यानाच्वंगु दुसा माओवादी केन्द्रं नं आः गृहमन्त्री थःपिंसं हे कायेगु कुतः यानाच्वंगु दु ।
म्हिगः च्वंगु माओवादी केन्द्रया पदा– धिकारी बैठकय् गृह मन्त्रालय आः माओवादीं हे कायेमाःगु खँ पिहां वःगु खः । पदाधिकारी बैठकय् उपमहासचिव शक्तिबहादुर बस्नेत, सचिव हितमान शाक्य व चक्रपाणी खनालं गृह मन्त्रालय माओवादीं कायेमाःगु धापू तयादीगु खः । पदाधिकारीतय्सं सहलहया झ्वलय् गृहमन्त्री लामिछानेया मुद्दा क्वमचाःगुलिं वय्कःयात हाकनं गृहमन्त्री दयेके मजिउगु माग नं याःगु खः ।
लिसें प्रधानमन्त्री सफल जुइगु खःसा गृह, अर्थ व परराष्ट्र मध्ये छगू मन्त्रालय थःके दये हे माःगु जुयाः गृह मन्त्रालय माओवादीं हे कायेमाःगु अडान तःगु खः । सांसद मखयेधुंकूम्ह लामिछानेयात तत्काल मन्त्री दयेकेबलय् आलोचना जुइफु धासें रास्वपाय् आः गृहमन्त्री जुइम्ह नेता मदुगुलिं माओवादीं हे गृह मन्त्रालय कायेमाःगु खँ नं वःगु खः ।
पदाधिकारी बैठक सिधयेकाः पिहां वःम्ह प्रधानमन्त्री पुष्पकमल दाहालयात पत्रकारतय्सं आः गृहमन्त्री सुयात दयेकेगु धकाः न्यंगु न्ह्यसःया लिसः बिसें वय्कलं धयादिल, ‘दयेकेधुंकाः सी दइ ।’
लामिछानेया हाकनं गृहमन्त्री दयेकेमाः धकाः एमालें दबाब बियाच्वंगु खँ नं पिहां वःगु दु ।
LEAVE YOUR COMMENTS