वहस शुरु- प्रमं विश्वासया मत काये हे माःगु खः

येँ – संसद विघटन विरुद्ध लाःगु रिटयात कयाः म्हिगःनिसें वहस न्ह्याःगु दु । म्हिगः निवेदक सन्तोष भण्डारीं न्हापांगु बहस यानादीगु खः। थःगु वहसय् अधिवक्ता भण्डारीं प्रम ओलीं संविधानया धारा ७६ (३) कथं नियुक्ति जूगु जुयाः धारा ७६ (४) कथं विश्वासया मत कायेमाःगु खःसां विश्वासया मत नं मकाःगु व राजीनामा नं मबिउगु खँ धयादिल ।

मेम्ह कानुन व्यवसायी सुजन नेपालं प्रधानमन्त्री संविधानया धारा ७६ कथं नियुक्त जूगुलिं वय्कलं अनिवार्य रुपं संविधानया धारा ७६ या उपधारा ४ कथं विश्वासया मत कायेमाःगु जिकिर यानादिल ।

अथे हे निवेदक शैलेन्द्रप्रसाद अम्बेडकरं छकः विश्वासया मत मदु धायेगु अले हाकनं प्रधानमन्त्री दाबी यायेगु खँ त्रुटिपूर्ण जूगु धयादिल । वय्कलं न्ह्यःने धयादिल, ‘संसदय् विश्वासया मत मकायेगु तर विश्वासया मत दु धकाः मेगु सरकारय् दावी नं यायेगु, थ्व गम्भीर त्रुटि जुल ।’ संसदय् विश्वास मदु धाइम्ह प्रधानमन्त्रीं मेगु सरकारया दावी याये मिले मजूगु खँ नं वय्कलं जिकिर यानादिल ।

अधिवक्ता मोहना अन्सारीं फागुन ११ थें तुं सर्वोच्च अदालतं हाकनं संविधानया रक्षा याइगु विश्वास प्वंकादिल । उकथं हे निवेदक राजकुमार सुवालं प्रतिनिधिसभाया कार्यकाल न्यादँया जूगु व जनतां न्यादँया नितिं निर्वाचन यानाछ्वःगु सांसदं थःगु कार्यकाल तक ज्या यायेमाःगु जिकिर यानादिल । वय्कलं प्रधानमन्त्रीयात विश्वास बीगु कि मबीगु धइगु खँ संसदया जूगु धासें उकिया परीक्षण नं संसदय् जुइमाः धयादिल ।

उकथं हे अधिवक्तातय्सं संवैधानिक इजलासय् न्यायाधीश बमकुमार श्रेष्ठ दुथ्याःगु खँयात कयाः नं आपत्ति प्वंकूगु जूगु दु । वरिष्ठ अधिवक्ता गोविन्द बन्दीं फागुन २३ या फैसलां न्यायाधीश बमकुमार श्रेष्ठ बारे न्ह्यसः ब्वलंगु धासें न्यायाधीश श्रेष्ठ संवैधानिक इजलासं चिलेगु हे शोभनीय जुइगु खँ धयादिल ।
उगु इलय् प्रधानन्यायाधीश चोलेन्द्रशम्शेर जबरां न्यायाधीशयात कयाः न्ह्यसः मथनेत इनाप यासें न्यायाधीश हिलेत दबाब बीगु स्वीकार्य मजुइगु खँ धयादिल । नेपाल कम्युनिष्ट पार्टी (नेकपा) भंग यासें निगू पार्टीयात न्हापाया हे स्थितिइ हयेगु फैसला याःपिं निम्ह मध्ये छम्ह न्यायाधीश श्रेष्ठ नं खः ।

सम्बन्धित बुखँ

LEAVE YOUR COMMENTS