सर्वोच्चपाखें सरकारयात उजं

येँ – सर्वोच्च अदालतं नेकपा विप्लव पुचःया प्रवक्ता खड्गबहादुर विश्वकर्मा प्रकाण्डयात हिरासत मुक्त यायेत बिउगु बन्दी प्रत्यक्षीकरण आदेशया पटक पटक उल्लंघन याःगु ठहर याःगु दु । लिसें कानून कार्यान्वयन याइगु निकायपाखें आदेशयात अपमान यात धासें उकी गम्भीर सरोकार नं क्यंगु दु ।

न्यायाधीश सपना मल्ल प्रधान व टंकबहादुर मोक्तानया मंकाः इजलासं थौंकन्हय् नुवाकोटय् हिरासतय् तयातःम्ह प्रकाण्डयात जिल्ला न्यायाधीशया रोहबरय् त्वःतेत नं आदेश बिउगु दु । थ्व स्वयां न्ह्यः सर्वोच्च अदालतं निक्वः तक हिरासत मुक्त यायेत आदेश बीधुंकाः नं प्रहरीं प्रकाण्डयात ज्वंगु खः ।

गैरकानुनी थुनां मुक्त यायेत आदेश बियाच्वंगु इलय् उकियात उल्लंघन यानाः हाकनं ज्वगु धासें सर्वोच्चं प्रकाण्डयात हिरासत मुक्त यायेत आदेश बिउगु दु ।

आदेशय् धयातःगु दु, ‘थुकथं अदालतया आदेशया सम्मान व कार्यान्वयन यायेमाःगु कानुनी दायित्व दुगु निकायपाखें बारम्बार बन्दी प्रत्यक्षीकरण सम्बन्धी जूगु आदेशयात असम्मान याःगुलिं अदालतया गम्भीर सरोबार दु ।’