चुनावया लागिं निर्वाचन आयोगं तयारी न्ह्याकल

येँ (नेपालभाषा टाइम्स) – निर्वाचन आयोगं आकिवं वैशाख १७ व २७ गते जुइगु मध्यावधि निर्वाचनयात ध्यानय् तयाः ‘मतदानस्थल व मतदान केन्द्र निर्धारण कार्यविधि, २०७७’ व उकिया कार्यान्वयनया निंतिं ‘मतदान स्थल व मतदान मतदान केन्द्र पुनरावलोकन सम्बन्धी ज्याझ्वः, २०७७’ स्वीकृत याःगु दु । आयोगया प्रवक्ता राजकुमार श्रेष्ठया कथं स्वीकृत कार्यविधि व ज्याझ्वः कथं थ्वहे वइगु पुस २३ गते जिल्लास्तरय् मतदान स्थल व मतदान केन्द्र निर्धारण सम्बन्धी ज्या शुरु जुइ ।

श्रेष्ठया कथं समितिं वइगु माघ १७ गते तक थःगु ज्या क्वचायेकेमाःगु कार्यतालिका नं स्वीकृत यायेधुंकूगु दु । प्रजिअया संयोजकत्वय् दुगु जिल्ला मतदानस्थल तथा मतदान केन्द्र सिफारिस समिति मार्फत मतदान स्थल तथा मतदान केन्द्र पुनरावलोकन सम्बन्धी ज्याझ्वः सञ्चालन जुइगु जूगुलिं फुक्कं राजनीतिक दल, स्थानीय तह, नागरिक समाज, पत्रकार व फुक्कं सरोकारवालापाखें मतदान केन्द्र पुनरावलोकन ज्याझ्वलय्थः थःगुपाखें ग्वाहालि यायेत नं इनाप यानातःगु दु । निर्वाचनया निंतिं अन्तिम मतदाता नामावली दयेकेगु नं शुरु जुइधुंकूगु दु ।