विपक्षी दलत आन्दोलनपाखे : माधव पक्षीय नेकपा, कांग्रेस व जसपापाखें कार्यक्रम घोषणा
येँ (नेपालभाषा टाइम्स) – प्रधानमन्त्री केपी ओलीं संसद विघटन याःगु विरुद्ध थीथी राजनीतिक पार्टीं आन्दोलनया घोषणा याःगु दु । पुष्पकमल दाहाल व माधव नेपाल पक्षीय नेपाल कम्युनिष्ट पार्टीं थ्वहे वइगु पुस १४ गते देय्न्यंकं प्रदर्शन यायेगु घोषणा याःगु दु ।
म्हिगः नेकपाया केन्द्रीय कमिटीया बैठक लिपा पार्टीया प्रवक्ता नारायणकाजी श्रेष्ठं आन्दोलन बारे जानकारी बियादीगु खः । प्रवक्ता श्रेष्ठया कथं न्हापांगु चरणया आन्दोलन लिपा निगूगु चरणया आन्दोलन कथं नेपाल बन्द तकया ज्याझ्वः वये फइगु सम्भावना दु । वय्कःया कथं वइगु पुस १४ गते देय्न्यंकं प्रदर्शन जुइसा बागमति प्रदेशया हकय् धाःसा येँय् केन्द्रित यानाः प्रदर्शन जुइ । उकिया निंतिं प्रदेशया फुक्क जिल्लाया नेता कार्यकर्तायात येँय् केन्द्रित याइगु जूगु दु । आन्दोलन न्ह्याकेगु निंतिं प्रवक्ता श्रेष्ठया हे संयोजकत्वय् २५०१ म्ह दुजः दुगु जनआन्दोलन परिचालन समिति नं नीस्वंगु दु ।
थ्वहे झ्वलय् थौं फिब्व ख्यलय् मुनाः मंकाःपौ सहित निर्वाचन आयोग वनेगु ज्याझ्वः तयातःगु दुसा २ बजे पत्रकार सम्मेलन याइगु जूगु दु । उकथं हे ११ गते न्हय् गुलिं प्रदेश कमिटीया बैठक सम्बन्धित प्रदेशय् यायेगु व १२ गते ७७ जिल्लाय् जिल्लास्तरीय भेला यायेगु निर्णय नं याःगु दु । पुस २० गते नगर लिसे गां व २५ गते तक वडास्तरीय बैठक लिसें भेला यायेगु निर्णय नं म्हिगः च्वंगु केन्द्रीय कमिटीया बैठकं याःगु दु ।
अथे हे नेपाली कांग्रेसं नं पुस १३ गते संसद विघटन विरुद्ध देय्न्यंकं आन्दोलन यायेगु घोषणा याःगु दु । म्हिगः च्वंगु केन्द्रीय कार्यसमितिया बैठकं आन्दोलन यायेगु निर्णय याःगु खँ कांग्रेसया महामन्त्री पूर्णबहादुर खड्कां कनादीगु दु । कांग्रेसं कन्हय् देय्न्यंकंया १६५ निर्वाचन क्षेत्रय् विरोध ज्याझ्वः यायेत्यंगु दु। उकथं हे जनता समाजवादी पार्टी नेपाल (जसपां) नं आन्दोलनया तयारी शुरु याःगु दु। जसपां थौं प्रधानमन्त्री ओलीया पुत्ला च्याकेगु, पुस ११ गते मशाल जुलुस पिकायेगु व १२ गते बृहत् प्रदर्शन यायेगु ज्याझ्वः तयातःगु दु ।
LEAVE YOUR COMMENTS