फास्ट ट्राय्क फास्ट मजुल

येँ (नेपालभाषा टाइम्स)÷वन सम्बन्धी कानुनं यानाः नेपाःया थीथी विकासया ज्या न्ह्याकेत थाकुयाच्वन धकाः विद्युत प्राधिकरणं याःगु गुनासो लिपा आः अज्याःगु हे गुनासो नेपाली सेनां नं याःगु दु । नेपाली सेनाया जिम्माय् लानाच्वंगु येँ–निजगढ फास्ट ट्राय्कया ज्या थौंकन्हय् वन सम्बन्धी कानुनं यानाः न्ह्याके मफयाच्वंगु खँ नेपाली सेनाया प्रधान सेनापति प्रभुराम शर्मां कनादीगु दु ।

प्रतिनिधिसभाया राज्य व्यवस्था तथा सुशासन समितिया म्हिगः च्वंगु बैठकय् न्ववासें प्रधान सेनापति शर्मां फास्ट ट्राय्क दयेकेगु लागिं थीथी थासय् सिमा पालेमाः, तर नेपाःया कानुनं यानाः प्यमा सिमा पालेत नं गुला बीगु जुयाच्वंगु कारणं ज्या न्ह्याकेत थाकुयाच्वंगु खँ कनादिल ।

थज्याःगु समस्या चीकेगु लागिं वन सम्बन्धी काननु संशोधन यायेमाःगु माग नं वय्कलं यानादिल । वय्कलं धयादिल, ‘फास्ट गतिं ज्या यायेगु खःसा कानुन नं अज्याःगु हे फास्ट कथंया वये माल । थ्व कानुन संशोधन मयात धाःसा २०८३ सालय् नं फास्ट ट्राय्क दयेके सिधइ मखु ।’

नेपाली सेनां दयेकाच्वंगु फास्ट ट्राय्कया प्रगति तसकं म्हो जुयाच्वंगु द्वपं लानाच्वंगु दु । वंगु खुदँया दुने फास्ट ट्राय्कय् मुक्कं २८ प्रतिशत जक ज्या सिधःगु दु ।
लुमंकेबहः जू, वन सम्बन्धी कडा कानुनं यानाः विद्युत प्रशारणया ज्या यायेत तकं तसकं थाकुयाच्वन धकाः नेपाल विद्युत प्राधिकरणया प्रमुख कुलमान घिसिङं नं छुं न्हि न्ह्यः तिनि गुनासो यानादीगु खः । थाय्थासय् सिमा पाले मफयाः विद्युत प्रशारण लाइन साले मफुगु व थुकिं यानाः नेपालय् उत्पादन जूगु विद्युत नं मेथाय् छ्वये मफयाच्वंगु खँ वय्कलं कनादीगु खः ।

प्रधान सेनापति शर्मां थुकिया लागिं याकनं कानुन संशोधन यायेमाःगु बिचाः तसें सांसदतय्त उकिया लागिं इनाप नं यानादिल । वय्कलं वि.सं. २०८३ साल तक येँनं निजगढ तक गाडी वने फइगु तक यायेगु बिचाः यानाच्वनागु खँ नं कनादिल ।

अथे हे प्रधान सेनापति शर्मां नेपाली सेनाया थीथी उच्चपदस्थ पदाधिकारीतय्गु उमेरया खँ पित हयाः सेनायात विवादय् लाकेत स्वयाच्वंगु द्वपं नं बियादिल । फुक्क पदाधिकारीतय्गु उमेर स्वयाच्वनेगु लागिं नेपाली सेना मचाबू ब्यंकीगु थाय् मखु धकाः नं आक्रोश प्वंकादिल ।