शताब्दीपुरुष जोशीया किपा दुगु हुलाक टिकट पिदन

येँ – वाङमय शताब्दी पुरुष सत्यमोहन जोशी थःगु जीवनकालय् हे थःगु किपा दुगु हुलाक टिकट स्वयेखंम्ह न्हापांम्ह व्यक्ति जुयादीगु दु । फिलाटेलिक तथा हुलाक टिकट व्यवस्थापन कार्यालयं म्हिगः वय्कःया किपा दुगु टिकट प्रकाशन याःगु खः । आःतक नेपालय् पिहां वःगु हुलाक टिकटय् सुं नं जीवित व्यक्तिया किपा तयाः हुलाक टिकट पिहां वःगु मदुनि । गुलि नं विशिष्ट व्यक्तित्वतय् किपा तयाः टिकट पिहां वल, व फुक्कं वय्कःपिं मदयेधुंकाः जक पिदनाच्वंगु खः । तर भाजु जोशी किपा दुगु हुलाक टिकट धाःसा वय्कःया जीवनकालय् हे पिहां वःगु खः ।

म्हिगः राष्ट्रपति विद्यादेवी भण्डारीं जोशीया किपा दुगु हुलाक टिकटय् न्हापांगु टाँचा तयाः टिकटया प्रकाशन सुरु यानादीगु खः । हुलाक टिकट व्यवस्थापन कार्यालयया कथं झितका वं झिगू लाख पाः जोशीया किपा दुगु हुलाक टिकट पिहां वःगु दु ।

वंगु आइतवाः च्वंगु मन्त्रिपरिषद्या बैठकं शताब्दीपुरुष जोशीया किपा दुगु हुलाक टिकट प्रकाशन यायेत स्वीकृति बिउगु खः । टाँचा तयेगु ज्याझ्वलय् न्ववानादिसें सूचना तथा सञ्चार मन्त्री पार्वत गुरुङ ‘छगू जुगय् छन्हु वइ’ धाःथें शताब्दीपुरुषया जीवनय् नं सरकारं विशिष्ट सम्मान याःगु न्हि थौं जूगु खँ धयादिल । मन्त्री गुरुङं धयादीगु दु, ‘वाङमय शताब्दी पुरुष जोशीया जीवनया न्हूगु इतिहास थनिंनिसें सुरु जूगु दु । थ्व इतिहासया दस्तावेजया रुपय् दयाच्वनी ।’

सम्बन्धित बुखँ

LEAVE YOUR COMMENTS