लँजुवाःतय् निंतिं सार्वजनिक थाय् डस्टविन

येँ – लँय् जुइपिं लँजुवाःतय्सं न्ह्यःने लाःथाय् वांछ्वइगु फोहरयात व्यवस्थापन यायेत थाय्थासय् फोहर वांछ्वयेगु थल (डस्टविन) तइगु जूगु दु । येँ महानगरपालिकां लँय् जुइपिं लँजुवाःतय्सं वांछव्इगु फोहर व्यवस्थापनया निंतिं सार्वजनिक थासय् उकथंया फोहर वांछ्वयेगु थल तयेगु व्यवस्था याःगु खः ।

येँ मनपां वडा नं. ७ पाखें थुकिया शुरुवात यायेधुंकूगु दुसा आः मेमेगु वडाया व्यस्त व सार्वजनिक थासय् नं उकथंया थल तयेगु व्यवस्था याइगु जूगु दु । येँ मनपा ७ वडाअध्यक्ष शुद्धकुमार डंगोलं वातावरण स्वच्छताया निंतिं स्वस्थ सहरी जीवन अभियान शुरु यायेत येँ मनपां उकथं अभियान न्ह्याकूगु जानकारी बियादिल ।

येँ मनपाया थुगु अभियानय् शैक्षिक संस्थाया सामाजिक उत्तर दायित्व अन्तर्ग ७ वडाय् च्वंगु सेन्ट लरेन्स कलेजया अध्यक्ष केशवप्रसाद दंगालं वडाअध्यक्ष डंगोलयात ७० लिटर फोहर संकलन क्षमताया ५० गः डस्टविन लःल्हानादीगु खः । येँ महानगरपालिकां लिपांगु इलय् स्वनिगलय् खने दयाच्वंगु फोहर व्यवस्थापनया समस्यायात म्हो यायेगु ल्याखं थुकथंया अभियान न्ह्याकूगु खः ।