सत्यमोहनया सछिदँ थुकथं हनी

यल – शताब्दी पुरुष सत्यमोहन जोशीया सछिदँ विशेष रुपं न्यायेकेगु लागिं यल महानगरपालिकां मेयर चिरिबाबु महर्जनया अध्यक्षताय् छगू विशेष समारोह समिति गठन याःगु दु ।थ्वहे वइगु वि.सं. २०७६ सालया वैशाख ३० गते वय्कः ९९दँ फुनाः १०० दँय् क्यनीगु जुयाच्वंगु दु ।

वय्कःया सछिदँ बुन्हियात विशेष रुपं हनेगु लागिं समारोह समितिं नेपाल राष्ट्रय बैंकया अनुमति कयाः लुँयागु पाँय्म्वहः पिकायेगु, हुलाक टिकट पिकायेगु, सत्यमोहन जोशी पार्क दयेकेगु व महा नगरपालिका लिसे स्वाइगु न्ह्यागुसां छगू लँपुया नां ‘सत्यमोहन मार्ग’ तयेगु कार्यक्रम दयेकेधुंकूगु दु ।

वय्कः सछिदँ क्यनीगु थ्व पूरा वर्ष हे थीथी ज्याझ्वः यानाः थ्व लसता हनेगु निर्णय नं मनपां याःगु दु । थ्व लसताय् थीथी साहित्यिक ज्याझ्वःत यायेगु, कासा, सांस्कृतिक महोत्सव व थीथी कथंया धेंधेंबल्लाः यायेगु नं तयारी जुयाच्वंगु दु । अथे हे वय्कःया नामं छगू
प्रतिष्ठान गठन यायेगु निर्णय यासें उकिया लागिं जग्गा मालेगु ज्या जुयाच्वंगु खँ नं धाःगु दु ।

नेपाःया मूर्त व अमूर्त सम्पदा बारे ज्वः मदुगु योगदान यानादीम्ह भाजु जोशीयात थगुने नेपाल सरकारं ‘वाङ्मय शताब्दी पुरुष’ धइगु उपाधिं छाय्पिउगु खः । श्रष्टायात जीवित दनिबलय् हे सम्मान याये फुसा व ज्या सार्थक जुइ धइगु तायेकाः यल महानगरपालिकां थ्व ज्या यायेत्यनागु खँ धाःगु दु ।