नेवाः आइडलया निंतिं संगीतकःमि मुना

येँ – नेवाः आइडल ज्याझ्वः ताःलाकेया निंतिं वंगु शुक्रवाः संगीतकःमि मुना ज्याझ्वः जुल । मोहनि नखःया लसताय् भिंतुना कालबिल यायेगु नापं नेवाः आइडल ज्याझ्वः ताःलाकेया निंतिं सहलह ब्याकेकथं उगु ज्याझ्वः जूगु खः । फाल्कन इभेन्ट प्रा.लि.या ग्वसालय् जुइगु नेवाः आइडल ताःलाकेया निंतिं जूगु संगीतकःमि मुना ज्याझ्वः जनकवि दुर्गालाल श्रेष्ठया सभापतित्वय् जूगु खःसा ‘गोल्डेन भ्वाइस अफ नेपाल’ नेपाल प्रेमध्वज प्रधान मूपाहांकथं झायादीगु खः ।

इभेन्टया प्रबन्ध निर्देशक मनोज नेवाः खड्गी, कवि राजभाई जकःमि, निर्देशक पवन जोशीं ज्याझ्वःया थीथी पक्षयात कयाः कुलादीगु खःसा नेपालभाषा ख्यःया नांजाःपिं संगीतकःमिपिं बुद्ध साय्मि, गोविन्द ह्यूमत, सुरज व्यञ्जनकार, संघरत्न शाक्यपिंसं नं नुगःखँ तयादीगु खः ।
ज्याझ्वलय् नेपालभाषा सांगीतिक ख्यःया आपालं न्हूपिं, पुलांपिं म्येँ च्वमि, म्येँ हालामि, लय्चिनामि, संगीत संयोजकया उपस्थिति दुगु खः ।