भ्रम ब्वलंकूपिं अनलाइनतय्त कारवाही

येँ – कोरोना भाइरस संक्रमणयात कयाः छुं अनलाइन माध्यमतय्सं अतिकं भ्रामक व अतिरञ्जित शीर्षक तयाः समाचार सम्प्रेषण यानाच्वंगु खँय् प्रेस काउन्सिल नेपालया गम्भीर ध्यानाकर्षण जूगु दु । देश लकडाउनय् लानाच्वंगु इलय् समाजय् ‘फेक न्युज’ प्रशारण यानाः जनतायात दिग्भ्रमित याये फुगु खँयात ध्यानय् तयाः प्रेस काउन्सिल नेपालं लगातार अनुगमन यानाच्वंगु दु ।

अथे आपत्तिजनक शीर्षक तयाः उत्तेजना न्यंकेगु ज्या याःगु द्वपनय् काउन्सिलं म्हिगः छन्हुं जक थप खुगू अनलाइनयात थीथी स्तरया कारवाही याःगु दु । उकी मध्ये स्वंगू अनलाइनयात विवादास्पद सामग्री चीकाः २४ घौया दुने स्पष्टीकरण बीत निर्देशन बिउगु दु । मेगु स्वंगू वेबसाइटयात नेपाः दुने खुले याये मफयेका बीगु लागिं नेपाल दूरसञ्चार प्राधिकरयात पौ च्वया छ्वःगु दु ।

कोरोना संक्रमणया हे सन्दर्भय् प्रेस काउन्सिलं ११ गू अनलाइनयात नेपाः दुने खुले याये मफइगु याना बिउगु दुसा मेगु २६ गूयात जिम्मेवारीपूर्ण जवाफ माग याःगु दु । थ्व संकटया इलय् भ्रमपूर्ण समाचार सम्प्रेषण मयायेत काउन्सिलं सकल सञ्चार माध्यमतय्त इनाप याःगु दु ।

(ने. सं. ११४० चौलाथ्व ४ / वि. सं २०७६ चैत १५, शनिवाः)