अस्ट्रेलियापाखें भुखाचं पीडितपिंत न्यागू करोडया ग्वाहालि

येँ (नेपालभाषा टाइम्स)÷ अस्टे«लियां जाजरकोटया भुखाचं प्रभावितपिनि निंतिं न्यागू करोड तका बराबरया ग्वाहालि बीगु जूगु दु ।

अस्ट्रेलिया सरकारं नकतिनि हे जक भुखाचं पीडिततय् निंतिं माःगु ज्वलं पूर्तिया निंतिं खुगू लाख अस्ट्रेलियन डलर (थ्यंमथ्यं न्यागू करोड ९० हजार) तका दां ग्वाहालि बीगु घोषणा याःगु खः । थुकी भुखाचं प्रभावित क्षेत्रय् ज्या यानाच्वंगु अस्ट्रेलयालिसे परिचित संस्थातय्त थप आकस्मिक मानविय सहयोगया साधन व्यवस्था यायेत ग्वाहालि याइ ।
थ्व ध्यबापाखें मानव विकास तथा सामुदायिक सेवा (एचडीसीएस) संस्थां भुखाचं प्रभावित स्वास्थ्य संस्था लगायतका सार्वजनिक संरचना पुनर्निर्माणय् ग्वाहालि याइगु खँ धाःगु दु ।

नेपाःया निंतिं अस्ट्रेलियाया राजदूत फेलिसीटी भोल्कें पश्चिमी नेपालय् वंगु भुखाचं जूगु मानवीय व सम्पत्ति क्षतिप्रति दुःख प्वंकुसें नेपाः व अस्ट्रेलिया दथुइ ताःई न्ह्यवनिसें मित्रता दुगु व माःगु इलय् ग्वाहालि आदानप्रदान जुयाच्वंगु खँ लुमंकादीगु दु ।

वय्कलं भुखाचं प्रभावित समुदाययात आवश्यक आकस्मिक ज्वलंया निंतिं व वइगु चिकुलाया निंतिं तयारी यायेगु अस्ट्रेलियां बिउगु ग्वाहालि ज्या वइगु खँ धयादीगु दु ।

नेपालभाषा टाइम्स

च्वमिया मेमेगु

• वतु त्वालय् दन्त शिविर
• पासा पुचः गुथि लन्दनया न्हूधाः
• ज्यापु समाजया निर्वतमान नायः तीर्थलालया अबु मंत
• ‘मौसम पूर्वानुमानयात गम्भीर रुपं मकाःगुलिं यक्व क्षति जूगु खः’ – वरिष्ठ माैसमविद् मणिरत्न शाक्य
• नखःचखःया दिं कायेत झीगु संस्कृतिया मौलिक परम्परा म्हसीकेमाल