गैंडाकोटया नेवाःतय् माग

येँ (नेपालभाषा टाइम्स) नवलपरासी (बर्दघाट–सुस्तापूर्व) या गैडाकोट नगरपालिकाय् च्वंपिं नेवाःतय्सं स्थानीय पाठ्यक्रमय् थःपिनि कला व संस्कृति दुथ्याकेत माग याःगु दु ।
नगरपालिकाया मुक्कं जनसंख्याया २० प्रतिशत नेवाः दुगुलिं स्थानीय पाठ्यक्रमय् नेवाः कला व संस्कृति दुथ्याकेत माग याःगु खः । नगरपालिकां च्यागू तगिं तक पाठ्यक्रम दयेकेधुंकूगु व उकी नेवाः कला संस्कृति दुमथ्याःगु खँ नेवाः पुचः गैंडाकोटया सल्लाहकार अमृत श्रेष्ठं धयादीगु दु ।

नेवाः संस्कृति बारे न्हू पुस्तां विद्यालय तहपाखें हे ज्ञान कायेमाःगुलिं स्थानीय पाठ्यक्रमय् नेवाः संस्कृति दुथ्याकेमाःगु माग पुचःया अध्यक्ष भोजराज श्रेष्ठं धयादीगु दु ।
गैडाकोटया नेवाःतय्सं म्हपुजा, रापाईं जात्रा, योमरी पुन्हिं, लाखे जात्रा, सापारु, बाघ जात्रा न्यायेकेगु याना वयाच्वंगु दु ।