थीथी भासं नेवाःया प्रचार यायेत इनाप
येँ(नेपाल भाषा टाइम्स)÷ वल्र्ड नेवाः अर्गनाइ– जेशनया केन्द्रीय नायः सिजन श्रेष्ठं सामाजिक सञ्जालपाखें छगू भिडियो अपिल जारी यासें थ्वहे वइगु मार्च ३० व ३१ तारिक कुन्हु नेपालय् जुइगु विश्व नेवाः दिवस ज्याझ्वः झःझः धायेकेत इनाप यानादीगु दु ।
वकुन्हु नेपाः वयेफुसा नेपालय् हे वयाः दिवस हनेगु व मफुसा थःपिं छु छु देशय् च्वंच्वनागु खः अन हे जूसां थःथःपिं मुनाः ‘विश्व नेवाः दिवस’ हनेत वय्कलं इनाप यानादीगु दु ।
आः वइगु मार्चया ३० व ३१ कुन्हु येँया नेपाः ब्यांक्वेटय् तःजिगु ज्याझ्वः जुइगु जानकारी बिसें वय्कलं वकुन्हु हे अमेरिकाया थीथी शहरय् च्वंगु नेवाः खलः पुचःया लिसें बेलायत, क्यानाडा, जापान, दक्षिण कोरिया, इजरालय, नेदरल्याण्ड, साउदी अरेबिया, युनाइटेड अरब इमिरेट्स, स्पेन, पोर्चुगल, हंगकंग, थाइल्याण्ड, चीन व भारतया थीथी थासय् नेवाः दिवस हनेगु लागिं तयारी जुयाच्वंगु जानकारी नं वय्कलं बियादीगु दु ।
अथे हे नेवाः दिवस कुन्हु थःपिं छु देशय् च्वंच्वनागु खः वहे देशया भासं नेवाः व नेवाः गौरवया बारे च्वयाः सामाजिक सञ्जालय् पोष्ट यायेत नं वय्कलं इनाप यानादीगु दु । अंग्रेजी छगू भासं जक मजुसे जापानी, कोरियन, हिन्दी, चिनियाँ, स्पेनिस, फ्रेञ्च, पोर्चुगिज, डच आदि थीथी भासं हे नेवाः बारे च्वयेबलय् सकस्यां थुइगु व नेवाः प्रति नेवाः जातिं जक मखु विश्वं हे गर्व याये फइगु आशा नं वय्कलं प्वंकादीगु दु ।
LEAVE YOUR COMMENTS