चुनाव ल्वाइगु दलतय् लागिं आयोगया निर्देशन

येँ – निर्वाचन आयोगं स्थानीय तह निर्वाचनय् ब्वति काइपिं राजनीतिक दलतय्त १७ बुँदे निर्देशन जारी याःगु दु । उम्मेदवार ल्ययेगु नितिं प्रचार प्रसारय् नालेमाःगु विषयवस्तु तयाः आयोगं राजनीतिक दलतय्गु नामय् निर्देशन जारी याःगु खः ।

निदेशनया न्हापांगु बुँदाय् संविधानया धारा ४७ या मौलिक हकया कार्यान्वयन सम्बन्धी व्यवस्था लुमंकेत राजनीतिक दलतय्त आयोगं इनाप याःगु दु । न्हापांगु बुँदाय् न्ह्यथनातःगु दु, ‘स्थानय् तहलय् लैंगिक लिसें समावेशी प्रतिनिधित्व सुनिश्चित जुइ कथं उम्मेदवार मनोनयनया व्यवस्था यायेगु ।’

आयोगया प्रवक्ता शालिग्राम शर्मा पौडेलं म्हिगः छगू विज्ञप्ति जारी यासें राजनीतिक दलतय्त निर्देशन बियादीगु खः । आयोगं घोषणापौ लगायत दस्तावेजय् लैंगिक व समावेशी सम्बन्धी व्यवस्थायात उचित सम्बोधन यायेत नं दलतय्त निर्देशन बिउगु दु ।

स्थानीय तहया प्रमुख वा उपप्रमुख, अध्यक्ष व उपाध्यक्ष मध्ये छगू पदय् जक उम्मेदवारी बीगु राजनीतिक दलयात मिसा उम्मेदवार दयेकेत नं आयोगं निर्देशन बिउगु दु । निर्देशनय् धयातःगु दु, ‘स्थानीय तहया प्रमुख व उपप्रमुख वा अध्यक्ष व उपाध्यक्ष पद मध्ये छगू जक उम्मेदवार बीगु राजनीतिक दलं मिसापिनिगु मनोनयनया व्यवस्था यायेत, २०७४ स १७५ दलित मिसा व वडा दुजलय् उम्मेदवारी हे मलाःगुलिं उगु पद प्वनाच्वंगु विषययात गम्भीरतापूर्वक कयाः प्रचलित कानुन बमोजिम फुक्कं वडाय् दलित मिसा उम्मेदवारी जुइगु व्यवस्थाया नितिं माःगु पहल यायेगु ।’

आयोगं उम्मेदवारीनिसें निर्वाचन गतिविधि समावेशी व समानुपातिक दयेकेत दलतय्त निर्देशन बिउगु दु । मिसा, दलित वा अल्पसंख्यक समुदायया नितिं आरक्षण यानातःगु पद बाहेकया पदय् उम्मेदवार मनोनयन यायेबलय् म्होतिं नं छगू तिहाइ मिसा व नेपाःया सामाजिक विविधता प्रतिविम्बित जुइ कथं समानुपातिक समावेशी सिद्धान्तया आधारय् उम्मेदवार मनोनयन यायेगु नितिं आयोगं निर्देशन बिउगु खः ।

ठेकेदारं चुनाव ल्वाये मदु
स्थानीय तहया निर्वाचनय् ठेक्कापट्टाया ज्याय् दुथ्याःपिं व्यक्तित उम्मेदवार जुइगुपाखें बञ्चित जुइगु जूगु दु । निर्वाचन आयोगया बुधवार च्वंगु बैठकं ठेक्कापट्टा वा चलअचल सम्पत्तिइ दुथ्याःपिं व्यक्ति उम्मेदवार जुइ मदइगु निर्णय याःगु खः । बैठक लिपा आयोगं स्थानीय तह निर्वाचनय् उम्मेदवारया मनोनयन पौया लिसे पेश यायेमाःगु स्वघोषणाया बुँदा तकं सार्वजनिक याःगु दु ।

गुकिं नेपाःया संविधान प्रति पूर्ण निष्ठावान दुगु, २१ दँ पूवंम्ह नेपाःया नागरिक जूगु, सम्बन्धित वडाया मतदाता नामावली नां दुथ्याःगु, सरकारी कोषं पारिश्रमिक वा आर्थिक सुविधा दइ कथं गुगुं नं लाभया धारणा मयाःपिं जुइमाःगु लगायतया बुँदा दु ।

सम्बन्धित बुखँ

LEAVE YOUR COMMENTS