विहारया चुनावं नेपालय् खतरा

ततःधंगु चुनावी सभां नेपालय् कोरोना तच्वयेफुगु ख्याच्वः

येँ (नेपालभाषा टाइम्स) – नेपाःलिसे सीमा स्वानाच्वंगु भारतया विहार राज्यय् शुक्रवाः जुइगु चुनाव सम्बन्धी ज्याखं यानाः नेपालय् कोरोना संक्रमिततय् ल्याः अझ अप्वइगु खतरा ब्वलंगु दु ।

विहारलिसे नेपाःया तराई लागाया १३ गू जिल्लाया सीमा स्वानाच्वंगु दु । सीमा स्वानाच्वंगु भारतया विहार राज्यय् तराईया स्थानीय जनताया वये वने जुइगु याः । खास यानाः बजार वनेगु, थःथिति नापलायेगु लागिं नं अथे वये-वने जुयाच्वंगु दइ । तर चुनाव सम्बन्धी ज्याखँया झ्वलय् विहारय्जु याच्वंगु व्यापक लापर्वाहीं यानाः नेपालय् समेत कोरोना संक्रमिततय् ल्याः अप्वये फुगु खँ धाःगु दु ।

कोरोना बारे अध्ययन यानाच्वंपिं विज्ञतय्सं धाः कथं लिपांगु इलय् नेपालय् कोरोना संक्रमिततय् ल्याः अप्वयाच्वंगुया छता मू कारण भारतीय सीमां नेपाः दुहां वइपिं मनूतय् ल्याः अप्वःगुलिं नं खः । भारतया विहार राज्यं नेपाः वइपिं मनूत तराई लागा जक मखु तप्यंक राजधानी येँय् समेत थ्यनाच्वंगु दु गुकिं यानाः येँय् नापं कोरोना संक्रमितया ल्याः अप्वया वनाच्वंगु दु। थौंकन्हय् येँया टेकु अस्पतालय् पीसीआर टेस्ट याकः वइपिं अधिकांश मनूत भारतीय नागरिक जुयाच्वंगु दु ।

भारतया विहार राज्यय् चुनावय् ब्वति कयाच्वंपिं थीथी राजनीतिक पार्टीतय्सं न्हिंन्हिं धइथें ततःधंगु आमसभा यानाच्वंगु दुसा अज्याःगु सभाय्सा माजिक दूरी कायम यायेगु वा स्वास्थ्य मापदण्ड सम्बन्धी छुं नं नियम पालना यायेगु ज्या जुयाच्वंगु मदु। आमसभा न्यं वइपिं मनूतय्सं मास्क तकं तया मवइगु खँ नं धाःगु दु। थुकिं यानाः चुनाव लिपा विहारय् कोरोनाया तःधंगु विष्फोट जुइ फइगु अनुमान विज्ञतय्सं यानाच्वंगु दु ।

चुनावया इलय् विहारलिसे स्वानाच्वंगु नेपाःया नाका बन्द यायेगु तयारी जुयाच्वंसां गां व जंगल लागाय् च्वंगु खुँलँपाखें मनूत वये-वने याइगु जूगुलिं सीमा बन्द याःसां उकिया छुं अर्थ मदइगु खँ धाःगु दु। अज्याःगु खुँलँपाखें तस्करीया ज्या समेत उतिकं जुयाच्वंगु दु । करिब ११ करोड जनसंख्या दुगु भारतया विहार राज्यय् आः तक २ लाखम्हेसित कोरोना संक्रमित जुइधुंकूगु दुसा उकी मध्ये १,०५८ म्हेसिया ज्यान वनेधुंकूगु दु। थौंकन्हय्अ न करिब १० हजारम्ह सक्रिय संक्रमितत च्वनाच्वंगु दु ।

विहारय् वर्तमान मुख्यमन्त्री नीतिश कुमार व विपक्षी दलया नेता तेजश्वी यादवया गठबन्धन दथुइ चुनावी प्रतिस्पर्धा जुयाच्वंगु दु। अन स्वंगू चरणया चुनाव जुइसा अन्तिम लिच्वः नोभेम्बर १० कुन्हु पिहां वइ । चुनावया लिच्वः पिहां वःलिसे अन त्याःम्ह उम्मेदवारं ततःधंगु विजय र्‍याली पिकाइगु नं चलन दु ।