नेपालभाषा शुद्धं च्वयेगु तालिम

ख्वप (नेपालभाषा टाइम्स)- नेपालभाषा अःपुक, यइपुक व न्ह्यइपुक च्वये ब्वने सयेकेगु तालिम ख्वपया युग विजय पुस्तकालयय् जुल । नेवाः देय् दबू ख्वप नगर समितिया ग्वसालय् उगु तालिम जूगु खः । छन्हुया तालिमय् प्रशिक्षक गोकूल मानन्धर (पौभा साय्मिं) व्यावहारिक रुपं नेपालभाषा अःपुक व शुद्ध च्वयेगु तालिम बियादीगु खः ।

थीथी विशेषतां जाःगु भाषा जुयाः हे नेपालभाषा थीथी कथं च्वयेगु ब्वनेगु चलन जुयाच्वंगु कनादिसें वय्कलं नेपालभाषाया पुलांगु पहः म्वाकेगु ज्या धाःसा ख्वपय् जक जुयाच्वंगु कनादिल । भाय् धयागु ई कथं हिलाच्वनीगु जूगुलिं नं अवस्था व ई कथं भाषाया पह पानावनीगु स्वाभाविक जुयाच्वंगु कनादिसें जीवन्त भाषा जुयाच्वंगु कारणं नं थथे भाय् हिलावनीगुलिं खँ धयादिल ।

प्रशिक्षण ज्याझ्वलय् वय्कलं मिलाफुति, सिन्हफुति, लिफुति ह्रश्व उकार, दीर्घ उकारया उच्चारण व चिना आखः च्वयेगु काइदा बारे उगु प्रशिक्षणय् सहभागीतय्त व्यावहारिक रुपं तालिम बियादीगु ख । प्रशिक्षण ज्याझ्वलय् नेवाः देय् दबूया स्वनिगः विशेष प्रदेशया न्वकु हरिबहादुर श्रेष्ठ, जिल्ला अध्यक्ष नरेश सुवाल, नगर अध्यक्ष कृष्णप्रसाद प्रजापति, नेवाः मिसा दबूया पदाधिकारी नापं भाषाह्यःमितय् सहभागीता दुगु खः । थुकथंया प्रशिक्षणं भाषा च्वये ब्वनेगु लागिं ग्वाहालि जुइगु अपेक्षा याःगु दु ।