कमलपुखू जःखःया संरचनाय् डोजर

येँ- येँ महानगरपालिका वडा नं. १ स्थित कलमपुखू लागाया जःखःया संरचना थुना बिउगु दु । येँ महानगरपालिकां कमलपुखू विस्तार यायेगु योजनाकथं पुखू जःखःया भौतिक संरचना थुना बिउगु खः ।

वंगु आइतवाः कमलपुखूया लागा विस्तार यायेगु योजना कथं पुखू लिक्कसं लाःगु महानगरीय प्रहरी वृत्त कमलपुखू, कमलपोखरी स्पोर्ट क्लब, राधे राधे सतः लगायतया भौतिक संरचनात थुना बिउगु खः । कमलपुखूया प्यकुनय् कंक्रिट, सिमेन्ट, डन्डी लगायत छुं नं आधुनिक निर्माण सामग्री प्रयोग मयासें कलात्मक सिँयागु मन्दः दयेकेगु योजना येँ मनपां दयेकाच्वंगु दु ।

महानगरपालिकाया प्रमुख प्रशासकीय अधिकृत राजेश्वर ज्ञवालीं गुरुयोजनाकथं हे कमलपुखूया पुनःनिर्माण यायेगु जानकारी बियादीगु दु । वय्कलं कमलपुखूया पुनःनिर्माण गुरुयोजनाकथं हे यायेगु निंतिं पुखू जःखःया भौतिक संरचना थुनेगु ज्या जूगु जानकारी बियादीगु दु ।
थ्व स्वयां न्ह्यः येँ महानगरपालिकाया प्रमुख विद्यासुन्दर शाक्यं विघटित प्रतिनिधिसभाया सांसद गगन थापां कमलपुखूया विषयय् म्वाःमदुगु खँ पित हयाः विवाद पिकायेत स्वःगु खँ धयादीगु खः । कमलपुखू पुनःनिर्माण यायेगु सम्बन्धय् राजनीति हावी जूगु धासें स्थानीयवासीलिसे तःक्वः हे सहलह यानाः पुखू निर्माणया डिजाइनयात अन्तिम रुप बियागु स्पष्ट यानादिल ।

पुनःनिर्माणया ज्या न्ह्याइगु जुसेंलि अनावश्यक खँ पित हयाः राजनीति यायेत स्वःगु द्वपं बियादिसें येँ मनपा प्रमुख शाक्यं याकनं हे पुखू पुनःनिर्माणया विषयय् पत्रकार सम्मेलन यानाः जानकारी बीगु नं धयादीगु दु ।