नेपाः टि–२० विश्वकपय् छनोट

येँ (नेपालभाषा टाइम्स) नेपाः झिदँ लिपा टि–२० विश्वकपय् छनोट जूगु दु । मुलपानी मैदानय् जूगु सेमिफाइनल कासाय् युएइयात बुकाः नेपाः टि–२० विश्वकपय् छनोट जूगु खः । नेपालं युएइयात च्यागू विकेट बुकाः सन् २०२४ य् अमेरिका व वेस्ट इन्डिजय् जुइगु टि–२० विश्वकपया निंतिं लुखा चायेकूगु खः । नेपाः निक्वखुसी टि–२० विश्वकपया निंतिं छनोट जूगु खः । थ्वयां न्ह्यः सन् २०१४ य् नेपालं टि–२० विश्वकप म्हितूगु खः ।

कासाय् न्हापां ब्याटिङ यासे युएइ नेपाःयात १३५ रनया लक्ष्य बिउगु खः । नेपालं युएइं बिउगु लक्ष्य १७.१ ओभरय् निगू विकेटयात क्षतिइ पुवंकूगु खः । नेपाःया निंतिं असिफ शेखं नटआउट ६३ रन दयेकूगु खः । शेखं खुगू चौका व निगू छक्का प्रहार याःगु खः ।

अथेहे कप्तान रोहित पौडेल ३५ रन दयेकेगु झ्वलय् स्वंगू चौका व छगू छक्का प्रहार याःगु खः । नेपाःया निंतिं गुल्शन झां २२ रन दयेकल । झां स्वंगू चौका थ्वाःगु खः । अथेहे ओपनर कुशल भुर्तेलं ११ रन दयेकूगु खः । भुर्तेलं निगु चौका थ्वाःगु खः । युएइया निलान्श केस्वानी व बासिल हामिदं छगू छगू विकेट काःगु खः ।

कासाय् न्हापां ब्याटिङ याःगु युएइं निर्धारित २० ओभर ९ विकेटया क्षतिइ १३४ रन दयेकूगु खः । युएइयाा अरविन्दं दकलय् अप्व ६४ रन दयेकूगु खः । नेपाःया निंतिं कुशल मल्ल स्वंगू विकेट काःगु खः । मल्लं स्वंगू ओभर बलिङ यासे मुक्कं ११ रन जक बिउगु खः । अथेहे सन्दीप लामिछाने निगू विकेट काःगु खःसा सोमपाल कामी व कप्तान रोहित पौडेलं छगू छगू विकेट काःगु खः ।

नेपाःलिसें ओमान नं टी–२० विश्वकपय् छनोट जूगु दु । टियु मैदानय् जूगु मेगु सेमिफाइनल कासाय् बहराइनयात १० विकेटं बुकाः ओमानं विश्वकपय् छनोट जूगु खः ।

बहराइनं निर्धारित २० ओभरय् ९ विकेटया क्षतिइ १०६ रन दयेकूगु खःसा ओमानं विना विकेटया क्षतिइ १४.२ ओभरय् लक्ष्य पूवंकूगु खः । विश्वकप टि–२०इ थाय् दयेकूगु नेपाः व ओमानं आइतवाः उपाधिया निंतिं फाइनल कासा म्हिती ।

सम्बन्धित बुखँ

LEAVE YOUR COMMENTS