मंसिरय् ‘वुमन्स अफ द वल्र्ड फस्टिभल’ जुइगु
येँ(नेपालभाषा टाइम्स)÷ वइगु मंसिरया न्हापांगु वालय् येँय् ‘वुमन्स अफ द वल्र्ड फेस्टिभल’ जुइगु जूगु दु । येँ महानगरपालिका व ब्रिटिस काउन्सिलया मंकाः ग्वसालय् वइगु मंसिर ८ व ९ (नोभेम्बर २३ व २४) य् निन्हुयंकं न्हय्क्वःगु संस्करणया उगु फेस्टिभल जुइत्यंगु खः ।
वंगु वालय् ब्रिटिस काउन्सिलय् जूगु छगू ज्याझ्वःया दथुइ येँ महानगरपालिकाया उपप्रमुख सुनिता डंगोल व ब्रिटिस काउन्सिलया कन्ट्री डाइरेक्टर साहिदा म्याकडुगलं न्हय्क्वःगु संस्करणया फेस्टिभलया संकेत चिन्ह (लोगो) सार्वजनिक यानादीगु खः ।
निन्हुयंकंया फेस्टिभलय् थीथी प्रकृतिया ब्वज्यालिसें नीन्यागू स्वयां अप्वः स्टल नं दइ । अथे हे पीगू स्वयां अप्वः सहलह, संवाल, मन्तव्य ज्याझ्वः दइसा झिगू स्वयां अप्वः संकिपा नं क्यनेगु ज्याझ्वः दुथ्याइगु जानकारी बिउगु दु ।
थुकथं हे झिगू स्वयां अप्वः सांगीतिक पुचलं प्रस्तुति बीगु ज्याझ्वलय् करिब न्यासः स्वयां अप्वः विद्यार्थीयात सहभागि याकेगु लक्ष्य कयातःगु दुसा झिद्वः स्वयां अप्वः मनूतय्गु सहभागिता दइगु अपेक्षा यानातःगु दु । लोगो सार्वजनिक ज्याझ्वलय् नवासें येँ महानगर उपप्रमुख डंगोलं नेपाःमि मिसातय्गु सहनशीलतालिसे स्वापू मदुगु धयातःगु, न्यना मतःगु, न्यनेकने मजूगु व कःघाना वयामच्वंगु बाखंयात ब्वज्याय् दुथ्याकेत बः बीगु खँ धयादीगु दु ।
वंगु जेठय् बेलायतय् जूगु फेस्टिभलय् ब्वति कयागु ईया अनुभव न्यंकादिसें वय्कलं मिसातय्गु अर्थपूर्ण सहभागिताया निंतिं नेतृत्वय् दुपिं मिसातय्पाखें थःत प्रेरणा प्राप्त जूगु खँ कनादीगु खः ।
लिसें गुगुं नं अन्तर्राष्ट्रिय ज्याझ्वलय् मिसाया नेतृत्वय् मुक्कं प्रतिनिधिमण्डलं जक ज्याझ्वलय् ब्वति काःगु येँ महानगरपालिकाया इतिहासय् थ्व न्हापांखुसी खः धयादिल ।
ज्याझ्वलय् नेपाःया निंतिं बेलायती राजदूत रोब फेनं फेस्टिभलपाखें मिसातय्त नेतृत्वदायी थासय् तक थ्यंकेक हौसला प्रदान याइगु विश्वास प्वंकादिल । फेस्टिभलया कन्ट्री डाइरेक्टर साहिदां म्याकडुगलं येँ महानगरपालिकालिसेया सहकार्यय् न्हय्गूगु संस्करणया ज्याझ्वः याये खंगुलिं लसता प्वंकादिसें थुकथं छगू न्हूकथंया आयाम कीत ताः लाइगु धारणा तयादिल ।
वंगु जेठय् बेलायतया म्यानचेष्टर सहरय् जूगु फेस्टिभलय् उपप्रमुख डंगोलया नेतृत्वय् नेपाली प्रतिनिधिमण्डलं ब्वति काःगु खः । सन् २०११ य् बेलायतया साउथ बैंकय् न्हापांगु फेस्टिभल जूगु खः ।
LEAVE YOUR COMMENTS