यलय् कथिन दान उत्सव

यल (नेपालभाषा टाइम्स)- यल प्याः पुखूस्थित श्री अष्ट सद्धर्मायतन बिहारय् छगू ज्याझ्वःया दथुइ कथिन दान जूगु दु । श्रीलंकाय् स्वीन्यादँ तक च्वनाबिज्याम्ह श्रद्धेय सागर महास्थविर भन्ते नं बर्षावास च्वनां बिज्यागु खः ।

कथिन दानया दातापिं इन्द्रलाल चित्रकार, इन्द्रशोभा चित्रकार, अनिल चित्रकार , रोजिना चित्रकार, एलिना चित्रकार व स्व. उपासक भाइलाल महर्जनया काय्म्ह्याय् लिसें परिवारजनपाखें कथिन चिवरयात परिक्रमा याना बोधिचर्या बिहार,भ्वंतया बिहार प्रमुख नापं च्याम्हम्ह संघ नायक जुयाबिज्याःम्ह श्रद्धेय बोधिसेन महास्थविरयात लःल्हागु खःसा उगु ज्याझ्वलय् वसपोलपाखें उपस्थित उपासक उपासिकापिंत पंचशील व कथिन चिवर दानया बारे धर्मदेशना नं याना बिज्याःगु खः ।

अखिल नेपाल भिक्षु महासंघया अध्यक्ष श्रद्धेय धर्मशोभन महास्थविरपाखें बुद्ध पुजा यानाः न्ह्याकाबिज्याःगु ज्याझ्वलय् श्रद्धेय पञ्ञासार महास्थविरपाखें पुण्यानुमोदन यानाबिज्यात सा कथिन दातापिंपाखें बिनय महर्जनं सुभाय् देछागु खः ।

दया खड्गी उपासिकां दान याना बियातःगु उगु बिहारया थुगुसीया कथिन दान ज्याझ्वःया लिपांगु झ्वलय् उपासक उपासपकापिंपाखें अष्टपरिस्कार नापं भन्ते गुरुमांपिंत दान प्रदान यायेगु ज्या जुगु खः ।