त्वाःबहाःया नां रञ्जना लिपिं तयेगु अभियान
येँ (नेपालभाषा टाइम्स)÷येँ मनपा २७ वडाय् स्थानीय त्वाःबहाःया नां रञ्जना लिपिं तयेगु अभियान न्ह्याकूगु दु । लिसें अन त्वाःया मौलिक नां तयेगु ज्या नं शुरु जूगु दु ।
बागमती प्रदेश सरकारं नेपालभाषा व तामाङ भाषायात सरकारी ज्याखँया भाषा दयेकेगु कानुन पारित यायेवं उकियात हे तिबः बी कथं येँ मनपा २७ वडाय् त्वाःया मौलिक नां रञ्जना लिपिं तयेगु अभियान शुरु जूगु खः ।
उगु वडाया वडा अध्यक्ष योगेश कुमार खड्गीं ‘नेपालभाषा टाइम्स’ यात कनादीकथं आः अन ३५ गू त्वाःया नां नेवाः भासं रञ्जना लिपि छ्यलाः तयेगु ज्या जुइधुंकूगु दु । नां तयेगु अभियान शुरु जुइवं त्वाःबहाःपिंसं अझ थप नां उपलब्ध याना बिउगुलिं आः हानं मेगु १० गू थप त्वाःया नां तयेगु तयारी जुयाच्वंगु दु ।
थ्व नां तयेगु लागिं स्थानीय पुलांपिं मनूतय्के न्यनेकने यानाः नां मुंकेगु ज्या जूगु खः । रञ्जना लिपिया साइनबोर्ड तयेवं आः मेमेपिंसं नं नां बियाः वडायात ग्वाहालि याः वयाच्वंगु दु ।
वडा अध्यक्ष खड्गीं कनादी कथं थ्व रञ्जना लिपिया साइनबोर्ड तयेगु ज्या वडाया थःगु हे बजेटं न्ह्याकूगु खः । इच्छा दत धाःसा वडाया बजेटं थुकथंया ज्या नं याये फइगु खँ वय्कलं कनादिल । थःगु वडा असं, भोताहिति थेंज्याःगु येँया मुख्य मुख्य लागा दुगु थाय् जुयाः अन नेवाः भाय् व रञ्जना लिपिया तःधंगु महत्व दुगु खँ नं वय्कलं कनादिल ।
मेखे येँ मनपां धाःसा थथे रञ्जना लिपिया साइनबोर्ड तयेबलय् फुक्क वडाय् एकरुपता खने दइकथं छगू हे डिजाइनया जुइमाःगु खँ धाःगु दु ।
साइनबोर्डय् नं लिपि छ्यलेत इनाप
वडाया त्वाःबहाःया नां लिपिं तयेगु थ्व अभियान लिपा आः वडा दुने लाःगु थीथी पसः व संस्थाया साइनबोर्डय् नं रञ्जना लिपि छ्यला यंकेगु अभियान न्ह्याकेगु खँ वडा अध्यक्ष योगेश कुमार खड्गीं कनादिल । रञ्जना लिपिं साइन बोर्ड तइपिंत न्हापा ९० प्रतिशत छुट बियातःगु खःसां आः थ्व छुट कटे याःगु खँ कँसें वय्कलं थ्व छुट हानं कायम यायेमाः धकाः सः तयाच्वनागु खँ नं कनादिल । साइनबोर्डय् लिपि छ्यलीपिंत वडां ग्वाहालि याइगु खँ नं धाःगु दु ।
LEAVE YOUR COMMENTS