ने. सं. ११४४ कौलाथ्व दुतिया -

खुल्ला आकाशं लुमुगु क्वथाय्

येँया थीथी क्षेत्रया सतकं वंगु सोमवाः चान्हय् जक न्यय्म्हेसिया उद्धार याःगु दु । येँ महानगरपालिका, मानव सेवा आश्रम, नेपाल प्रहरी, पशुपति क्षेत्र विकास कोष लगायत थीथी संघसंस्थाया समन्वयय् सोमवाः बहनिसिया ७ निसें १० ताः ईतक संचालन जूगु खोजी अभियानय् न्यय्म्हेसिया उद्धार याःगु खः ।

उद्धारया झ्वलय् गुलिखे वास्तविका सहयोगापेक्षी लुया वःगु खः । गुलिखे धाःसा मजदूरी यानाः सतकय् द्यनेगु, लागू वासः नयाः व अय्लाः त्वनाः सतकय् च्वनेगु व सतकय् हे फ्वनाः नयेगु यानाच्वंपिं दुगु खः । इमित भुइजःसिइ च्वंगु आश्रमय् तयातःगु आश्रम प्रदेश नं. ३ या संयोजक सुमन बर्तौलां जानकारी बियादिल ।

इपिंमध्ये परिवारय् च्वने फुपिंत परिवारया जिम्मा बियाः छ्वयेगु व असहाय, असक्तयात संरक्षण यानाः आश्रमय् हे तयातयेगु धाःगु दु ।
येँया महांकाःद्यः, पाःलाःद्यः (संकटा), लुँमधि (भद्रकाली), नक्सालय् च्वंगु महाद्यःया देगः, पशुपति क्षेत्र, गौशाला, चाबही, खास्थि, बानेश्वर लगायतया क्षेत्रं इमिगु उद्धार याःगु खः ।

थुपिं नापं आश्रमय् १३५ म्ह थ्यनेधुंकूगु दु । सतक सेवा अन्तर्गत सोमवाः जूगु खोजी व उद्धार अभियानय् आश्रमया प्रतिनिधि, कोषया सदस्य सचिव डा. प्रदीप ढकाल व प्रशासकीय अधिकृत गौरीशंकर पराजुली, महानगरपालिका कानून शाखाया निर्देशक वसन्त आचार्य, महानगरीय प्रहरी परिसरया प्रमुख वसन्त लामा, श्रीकृष्ण प्रणामी युवा परिषद्या अध्यक्ष नमराज ढकाल, पुलांम्ह सचिव सुरेशमान श्रेष्ठ, संस्कार समाज नेपालया अध्यक्ष पशुपति गुरुंग लगायता सहभागिता दुगु खः ।

कोषया सदस्य सचिव डा. ढकालं लिपांगु इलय् सतकय् असहाय असक्त म्हो जुया वनाच्वंसां नं फ्वनाः नयेगु पेशा दयेकाच्वंपिं, अय्लाः त्वनाः व मजदुरी यानाः सतकय् द्यनीपिनिगु अवस्था तसकं चुनौतिपूर्ण जूगुलिं उकिया व्यवस्थापन यायेमाःगु आवश्यक जूगु धयादिल ।
प्रहरी परिसर येँया प्रमुख लामां ख्वाउँसे च्वंगु छेँदिइ च्वनेगु अवस्थाया अन्त्यया निंतिं प्रहरी सहकार्य यायेत तयार दु धयादिल ।

थ्व स्वयां न्ह्यः परिसरया कुतलय् येँया थीथी क्षेत्रं झिन्याम्हेसिया उद्धार याःगुलिइ वास्तविकता अध्ययन यानाः अभिभावक हयाः सतकय् त्वःताः ध्यबा कमे यायेगु उद्धेश्य कयातःपिंत कारवाही यायेगु परिसरया प्रहरी नायब उपरीक्षक राजेन्द्र पोखरेलं कनादिल ।

आश्रमं २०६९ सालंनिसें हे सतकय् असहाय, फ्वनाः नये मफुपिं, मनोरोगी, असक्तयात उद्धार यानाः इमिगु सुसाःकुसाः यानाः मनोविमर्स सेवा बियाः छेँजलय् पुनःस्थापना याना वयाच्वंगु दु । वि.सं. २०८२ साल तकया दुने थज्याःपिं असहाय, अशक्त सतकय् दयाच्वनीगु अवस अन्त्य यायेगु अभियान दु ।

उकिया निंतिं दक्वं ख्यःया समन्वय आवश्यक दुगु आश्रमया केन्द्रीय अध्यक्ष रामजी अधिकारीं धयादिल । झिंनिगू जिल्लाय् आश्रम संचालन यानाः सेवा बिया वयाच्वंगु व आतकया दुने झिन्हय्सःयात उद्धार याःगुलिइ न्यासःयात छेँजलय् पुनःस्थापना यायेधुंगु अधिकारीं कनादिल ।