क्यानेडियन नेवाः गुथिया १७ क्वःगु साधारणसभा व न्हूधाः

येँ(नेपालभाषा टाइम्स)- क्यानाडाय् च्वनाच्वंपिं नेवाःतय् संस्था क्यानेडियन नेवाः गुथिया १७ क्वःगु वार्षिक साधारणसभा जुल । साधारणसभां गुथिया न्हूगु ज्यासना पुचःया नं ल्यज्या याःगु खः । गुथिया नायः प्रकाश प्रधानया सभापतित्वय् जूगु ज्याझ्वलय् न्वकु उत्तम माकःजुं लसकुस यानादिसें नेवाः परम्पराय् लसकुस यायेगु छगू थःगु हे संस्कार व संस्कृति जूगु खँ कनादिल ।

गुथिया मूछ्याञ्जे विमलमान श्रेष्ठं थःपिनिगु कार्यकालय् जूगु थीथी गतिविधि व ज्याझ्वःया वार्षिक प्रगति प्रतिवेदन न्ह्यब्वयादीगु खः । विधान संशोधन समितिया डा. प्रज्वल प्रधानं गुथिया विधानय् संशोधन यायेमाःगु नियमावली व उपनियमावलीया बारे बुँदागत रुपं प्रस्ताव न्ह्यब्वयादीगु खः ।

अथे हे आचारसंहिता समितिया कजि डा. कृष्ण कायस्थं गुथिया आचारसंहिताया नियमावली न्ह्यब्वयादीगु ज्याझ्वलय् गुथिया मिसा पुचःपाखें जूगु थीथी ज्याझ्वःया प्रतिवेदन लिउ दांभरिं चन्दा श्रेष्ठं न्ह्यब्वयादीगु खः । गुथिया पुलांम्ह छ्याञ्जे रविन प्रधानं गुथियात च्यारिटी श्रेणीइ यंकेगु निंतिं आतक जूगु प्रगतिया बारे जानकारी बियादीगु सभाय् सांस्कृतिक छ्याञ्जे सुरेन्द्रलाल श्रेष्ठं दछियंकं जूगु सांस्कृतिक गतिविधिया बारे जानकारी बियादीगु खः ।

थुकथं हे ल्याय्म्ह पुचःया आयुष्ना श्रेष्ठं ल्याय्म्ह वर्गया इच्छा व पुचलं संचालन यायेगु ज्याझ्वःया बारे जानकारी बियादीगु साधारणसभाय् दकलय् लिपा गुथिया दांभरिं राजेन्द्र महर्जन व लिउ दांभरिं श्रेष्ठं आर्थिक प्रतिवेदन न्ह्यब्वयादीगु खः ।

गुथिया छ्याञ्जे सुमन राजवंशीं ज्याझ्वः सुथां लाकेत ग्वाहालि यानादीपिं सकसितं सुभाय् देछानादीगु ज्याझ्वलय् सभा नायः प्रधानं साधारण सभाय् न्ह्यब्वःगु प्रतिवेदन व प्रस्ताव सर्वसम्मतिं पारित जूगु घोषणा यासें न्हापांगु सत्र क्वचायेकादीगु खः ।

निगूगु सत्रय् गुथिया न्हूगु ज्यासना पुचःया ल्यज्या याःगु खः । उत्तम माकःजुया अध्यक्षताय् नीस्वम्हेसिया न्हूगु ज्यासना पुचःया ल्यःगु खः । न्हूगु ज्यासना पुचलय् विमलमान श्रेष्ठ न्हापांम्ह न्वकु, सुरेन्द्रलाल श्रेष्ठ निम्हम्ह न्वकु, डा. प्रज्वललाल प्रधान मूछ्याञ्जे, मधुर राजभण्डारी लिउ मूछ्याञ्जे, शिव कारंजित दांभरिं व परशुराम श्रेष्ठ लिउ दांभरिं ल्यःगु दु ।

थुकथं हे दुजलय् डा. रिन्जन श्रेष्ठ, डा. कृष्ण कायस्थ, नरेश ताम्राकार, राजन श्रेष्ठ, बिनोद श्रेष्ठ, सुमन राजवंशी, चन्दा श्रेष्ठ, प्रतिमा प्रधान, कृष्ण ध्वँजू,, जलेन्द्र शाक्य व सुशील अणुयात ल्यःगु दुसा राजेन्द्र महर्जन (सांस्कृतिक सचिव), सुमनगोपाल प्रधान (जनसम्पर्क अधिकृत), रञ्जना प्रधान सैंजू (मिसा पुचः कजि) ल्यःगु दु ।

न्हूगु ज्यासना पुचलय् निवर्तमान नायःयात पदेन दुजः व ल्याय्म्ह पुचःपाखें छम्ह प्रतिनिधि दुथ्याकेगु प्रस्ताव नं पारित याःगु गुथिं जानकारी बिउगु दु । ज्यासना पुचः ल्ययेत गुथिया कानुनी सल्लाहकारलिसें निर्वाचन आयुक्त ब्यारिष्टर÷सोलिसिटर अतुल सुवेदीया संयोजकत्वय् निर्वाचन कमिटी गठन याःगु खः ।