ने. सं. ११४४ कौलाथ्व तृतीया -

डाक्टरयात हानं दाल, हानं हडताल

येँ (नेपालभाषा टाइम्स)- थनया सिनामंगलय् च्वंगु काठमाडौं मेडिकल कलेजय् ब्वनीपिं चिकित्सकतय्त दाःगु खँयात कयाः डाक्टरत हानं आन्दोलनय् कुहां वःगु दु ।
अनया डाक्टरतय्त विरामीया थःथितिपिंसं दाःगु खःसा उकिया विरुद्ध चिकित्सकतय्सं आन्दोलन याःगु खः । अस्पतालं धाः कथं उगु मेडिकल कलेजय् ब्वनीम्ह डा. मनिष खड्कायात विरामीया थःथितिपिंसं हातपात यायेवं अन ज्या यानाच्वंपिं स्वास्थ्यकर्मीतय्सं विरोध प्रदर्शन याःगु खः ।

इन्टर्न यानाच्वंम्ह चिकित्सकं ओपीडीइ मुनाः हल्ला मयायेत व पिने वनेत इनाप यायेवं विरामीया थःथितिपिंसं चिकित्सकयात म्हुतु वायेगु लिसें दायेगु समेत ज्या याःगु खः । वहे इलय् विरामीया थःथितिपाखें उम्ह चिकित्सकयात बचे याः वंम्ह छम्ह मिसाम्ह एटेन्डेन्टयात नं विरामीया थःथितिपिंसं हातपात याःगु खँ धाःगु दु ।

घटना लिपा अस्पतालय् ज्या यानाच्वंपिं डाक्टर व इन्टर्न यानाच्वंपिं लिसें सकलें स्वास्थ्यकर्मीतय्सं अस्पताल न्ह्यःने मुनाः नाराबाजी याःगु खः । उमिसं डाक्टरयात दाःपिं मनूतय्त तत्काल ज्वनाः वंगु वालय् तिनि गृहमन्त्रीया रोहवरय् जूगु सहमति कथं कारवाही यायेत माग याःगु खः ।

प्रहरीया कथं चिकित्सकयात दाःपिं निम्हेसित प्रहरीं ज्वनेधुंकूगु दुसा मेपिं निम्ह बिसिउँ वनाच्वंगु दु । ज्वंपिं रुपक गौतम व सरोज गौतम खः ।
उगु घटनाया विरोधय् प्रदर्शन याःपिं चिकित्सकतय्सं थःगु विरोधया ज्याझ्वः यायेत चक्रपथपाखे वनेत स्वयेवं आपालं ल्याखय् वःपिं प्रहरी व सशस्त्र प्रहरी परिचालन यानाः उमित पंगु खः ।

देय्या थीथी थासय् डाक्टरतय्त दाल धकाः छुं ई न्ह्यः तिनि डाक्टरतय्सं सतकय् प्रदर्शन यानाच्वंगु खः ।