बाराय् बलि विरोधीतय्गु भीड

गढीमाई मेलाय् द्वलंद्वः म्येय्–दुगुया बलि

येँ – बारा जिल्लाय् न्यादँय् छकः लछियंकं न्ह्याइगु चर्चित गढीमाईया मेलाय् म्हिगःनिसें बलि बीगु शुरु जुल । द्वलंद्वः म्येय् व दुगु स्यानाः बलि बीगु थ्व मेलाय् बलि रोके याये माल धकाः आह्वान यानाच्वंगु थीथी संस्थात नं थ्वहे इलय् बाराय् सक्रिय जूगु दु ।

गढीमाईया थ्व बलि रोके यायेगु लागिं मेला व्यवस्थापन समितिं सुयां छुं भाकल याना तयागु दुसा बलि बीगु पलेसा द्यःयात ध्यबा छाःसां जिउ धकाः प्रचार यानाच्वंगु दु । दुगुचा बलि बीगु इच्छा याःपिंसं स्वसः तका ध्यबा छाल धाःसा वयात दुगुचा बलि बिउगु सरह पूण्य लाइ धकाः प्रचार यानाच्वंगु दु ।

नापं द्यःया नामय् बखुं बलि बीगु पलेसा सर्गतय् त्वःता छ्वत धाःसा वयात व्यवस्थापन समितिं सुरक्षित याना तयेगु जुइ धकाः नं आह्वान याःगु दु । बलि बिउगु दृश्यया किपा समेत बन्द याकेगु लागि म्हिगःनिसें अन पत्रकारतय्त समेत रोक याना बिउगु दु ।तर बलि विरुद्ध थुलिमछि ज्याखँ जुयाच्वंसां अन बिल बीपिं मनूत धाःसा भ्याःभचा नं कम मजूगु खँ धाःगु दु ।

अन बलि बीगु लागिं पूर्वी तराई क्षेत्र जक मखु भारतया उत्तर प्रदेश, विहार व दिल्ली–मुम्बईनं नं तकं मनूत म्येय् ज्वनाः वयेगु याइ । छुं ई न्ह्यः अन बलि रोके या धकाः प्रचार याः वःपिं मनूतय्त नं होटलय् च्वनाः ला तरकारी नयाच्वन धासें स्थानीय मनूतय्सं हातपात याःगु खः ।
अन बलि बिउपिं जीव छेँय् यंके मजिउ धाइगुलिं उमित अन हे त्वःताथकी ।

अथे त्वःता थकीपिं सीपिं जीव उठे यायेगु ज्या स्थानीय चमार समुदायं याइगु खःसां आः चमारतय्सं नं सीपिं जीव उठे मयायेगु धकाः निर्णय याःगु दु । अथे खःसां सीपिं म्येय्या ला धाःसा मेपिंसं नं यंकेगु याः । थ्व लछिया दुने अन म्होतिं नं ३,००० म्ह स्वयां अप्वः म्येय् बलि बीगु खँ धाःगु दु ।

‘विश्व सम्पदाय् दुथ्याकेमाः’
गढीमाई मेलाया तच्वःगु आलोचना जुयाच्वंगु हे इलय् बारा जिल्लाय् नेकपा प्रदेश नंं. २ कमिटीया अध्यक्ष प्रभु साहं धाःसा गढीमाई द्यःयात विश्व सम्पदाया धलखय् दुथ्याकेमाः धकाः माग यानादीगु दु ।

न्यादँय् छक्वः अन जुइगु मेलाय् विश्वया हे ध्याना वनाच्वंगु कारणं युनेस्कों थ्व संस्कृतियात विश्व सम्पदाया धलखय् दुथ्याकेमाः धकाः वय्कलं माग यानादीगु खः । गढीमाई व अन आः जुयाच्वंगु मेलापाखें मधेसया गौरव बढे याइगु दावी नं वय्कलं यानादीगु दु ।

सम्बन्धित बुखँ

LEAVE YOUR COMMENTS