जेलय् वनाः रेशम चौधरीयाके भोट फ्वन एमाले नेतातय्सं

येँ (नेपालभाषा टाइम्स)- नेकपा एमालेया नेतातय्सं राष्ट्रपति निर्वाचनय् ग्वाहालि यायेत इनाप यासें डिल्ली बजार कारागारय् कुनातःम्ह नागरिक उन्मुक्ति पार्टीया संस्थापक नेता रेशम चौधरीयात नापलाःगु दु । चौधरीयात नापलायेत एमाले सचिव योगेश भट्टराई, नेतापिं कृष्णगोपाल श्रेष्ठ, भगवती चौधरी व थाकुर गैरेपिं वंगु खः ।

सचिव भट्टराईया कथं एमाले नेतातय्सं चौधरीयात नापलानाः राष्ट्रपति निर्वाचनय् एमालो उम्मेदवार सुवास नेम्वाङयात मत बीगु इनाप याःगु खः । उकिया लिसलय् चौधरीं वइगु फागुन २४ गते च्वनीगु पार्टीया बैठकं थुकिया बारे निर्णय याइगु जानकारी याकूगु खः ।

थ्व स्वयां न्ह्यः लोसपाया नेतात नापलायेत राष्ट्रपति उम्मेदवार सुवास नेम्वाङ थः नं वंगु खः । लोसपाया अध्यक्ष महन्थ ठाकुरयात नेम्वाङं राष्ट्रपतिइ ग्वाहालि यायेत इनाप यानादीगु खःसा लिसलय् ठाकुरं थःपिं च्यागू दलीय गठबन्धनय् दुथ्याःगु धासें पार्टीइ सहलह यायेगु बचं बियादीगु खः ।