नखःया निंतिं विशेष सुरक्षा योजना लागू यायेत निर्देशन
येँ(नेपालभाषा टाइम्स)÷ प्रहरी प्रधान ज्याकुथिं न्ह्यःने वयाच्वंगु तःधंगु नखःयात लक्षित यानाः विशेष सुरक्षा योजना दयेकाः लागू यायेत देय्न्यंकंया प्रहरी ज्याकूयात निर्देशन बिउगु दु । प्रहरी प्रधान ज्याकुथिं मोहनि, स्वन्ति, छठ थेंज्याःगु नखः न्ह्यःने वयाच्वंगु इलय् उकियात लक्षित यानाः विशेष सुरक्षा योजना दयेकाः लागू यायेत मातहतया दक्वं युनिटयात सर्कुलर जारी याःगु खः ।
नेपाल प्रहरीया केन्द्रीय प्रवक्तालिसें प्रहरी नायब महानिरीक्षक कुबेर कडायतं न्ह्यःने वयाच्वंगु देय्या हे तःधंगु नखःयात लक्षित यानाः आवश्यककथंया सुरक्षा प्रबन्ध यानाः सुरक्षा योजना तयार यानाः लागू यायेत देय्न्यंकंया मातहतया दक्वं ज्याकूयात सर्कुलर यानागु जानकारी बियादीगु दु ।
विशेष सुरक्षा योजना लागू यानाः घटना, दुर्घटना, आपराधिक गतिविधि पनेगुकथं सुरक्षा व्यवस्था चुस्त यायेगु व थुगु योजना लागू यानाः साविक स्वयां अप्वः सुरक्षाकर्मि परिचालन यायेगु वय्कलं जानकारी बियादीगु दु । नापं जोखिम क्षेत्र पहिचान यानाः चोरी, तस्करीलिसें मेगु गुगुंकथंया आपराधिक गतिविधि पनेत प्रहरीया चुस्त रुपं परिचालन यायेगु नं वय्कलं धयादिल ।
मेखे मोहनि, स्वन्ति, छठ थेंज्याःगु तःधंगु नखः न्ह्यःने थ्यनेवं आपराधिक क्रियाकलाप नं अप्वया वंगु दु । वंगु छुं दिं थुखे स्वनिगःया थीथी थासय् खुँज्या, लुटपाटलिसें मेमेगु प्रकृतिया आपराधिक घटना अप्वया वंगु प्रहरीं न्ह्यथंगु दु । अप्वःथें न्हिनय् व बहनिसिया इलय् खुँज्या (चोरी)या घटनात अप्वयाच्वंगु प्रहरी प्रधान ज्याकू, प्रहरी महानिरीक्षक सचिवालयं न्ह्यथंगु दु ।
लिपांगु इलय् येँया घट्टेकुलो, ख्वपया गठ्ठाघर, ख्वपया हे दधिकोटय् चोरीया घटना जूगु थुपिं स्वंगुलिं थासं भण्डै १८ गू लख दां, लुँवहया तिसाज्वलं, ल्यापटप, घडी, मोबाइल, मेमेगु ज्वलं खुया यंकूगु प्रहरीं जानकारी बिउगु दु ।
LEAVE YOUR COMMENTS