
येँ (नेपालभाषा टाइम्स)- नेवाः देय् दबू येँ महानगर समितिं म्हिगः छगू ज्याझ्वःया दथुइ दबूया थीथी निकाययात सुभाय् देछात । नेवाः देय् दबूया केन्द्रीय नायः पवित्र वज्राचार्य मूपाहां कथं झाःगु उगु ज्याझ्वलय् नेपाल संवत् न्हूदँ समारोह समितिया नायः प्रा.डा. नरेशमान वज्राचार्य व पाहांकथं नेवाः न्ह्यलुवा डा. महेशमान श्रेष्ठ, राष्ट्रिय भूमि आयोग येँ जिल्लाया नायः श्यामकृष्ण प्रजापति झाःगु खः ।
देय् दबू येँ महानगरसमितिया नायः शोभा महर्जन वज्राचार्यया सभापतित्वय् जूगु उगु ज्याझ्वलय् यःमरि पुन्हिया लसताय् नेवाः देय् दबू येँ २२ वडा कचाया ग्वसालय् जूगु त्यःछिंत्यः ज्याझ्वलय् ब्वति काःपिं कलाकार व ग्वाहालिमि– पिंत सुभाय् पौ बीगुया लिसें नेवाः दय् दबूया थीथी उत्कृष्ट वडा, उत्कृष्ट लागा, उत्कृष्ट कवः, उत्कृष्ट ज्याझ्वः व उत्कृष्ट उत्प्रेरक ग्वाहालिमिपिंत नं हनापौ बियाः विशेष सम्मान याःगु खः ।
ज्याझ्वलय् मूपाहां पवित्र वज्राचार्य, विशेष पाहां प्रा.डा. नरेशमान वज्राचार्य, त्यःछिंत्यः ज्याझ्वःया कजि राजन महर्जनं नं नुगःखँ तयादीगु खः । देय् दबूया २२ वडा कचापाखे वंगु यःमरि पुन्हिया झ्वलय् न्यान्हुयंकं थीथी थासय् सांस्कृतिक ज्याझ्वः सहित यःमरि फ्वनेज्या याःगु खः ।
LEAVE YOUR COMMENTS