क्यब्व अन्तरविद्यालय हिज्जे धेंधेंबल्लाः कासा क्वचाल

येँ (नेपालभाषा टाइम्स)- थीथी ब्वनेकुथिया मंकाः पुचः “क्यब्व” दि गार्डेन फर लर्नर्सया संयोजन व काठमाडौं मोडेल स्कुलया ग्वसालय् “क्यब्व अन्तर विद्यालय हिज्जे धेंधेंबल्लाः कासा २०८०” जुल ।

कासाय् जुनियर तगिंपाखें काठमाडौं मोडेल स्कुलं न्हाप, टाइम्स इन्टरनेशनल स्कुलं ल्यू, फ्युचर स्टार इंग्लिस स्कुलं लियांल्यू व स्वयम्भू इंग्लिस बोर्डिङ् स्कुलं हःपाः सिरपाः त्याकेत ताःलाःगु दु । अथेहे सिनियर तगिंपाखे फ्युचर स्टार स्कुलं न्हाप, काठमाडौं मोडेल स्कुलं ल्यू, टाइम्स् इन्टरनेशनल स्कुलं लियांल्यू व स्वयम्भू इङ्लिस बोर्डिङ् स्कुलं हःपाः सिरपाः त्याकूगु खः ।

ग्वसाः स्कुलया निर्देशक राजेन्द्र महर्जनया सभापतित्वय् जूगु ज्याझ्वःया उलेज्या “क्यब्व”या संयोजक मनोज कुमार श्रेष्ठ, ग्वसाः स्कूलया निर्देशक राजेन्द्र महर्जन, प्रिन्सिपल रविन महर्जन, क्यब्वया दुजःपिं विनोद श्रेष्ठ, ज्ञानकाजी महर्जनं मंकाःकथं त्वाः देवाय् मत च्याकाः यानादीगु खः ।

विजयी कासामिपिंत क्यब्वया संयोजक श्रेष्ठ, ग्वसाः स्कुलया निर्देशक महर्जन व प्रिन्सिपल महर्जन लिसें क्यब्वया दुजःपिं श्रेष्ठ व महर्जनं दसि–पौ, मेडल व ट्रफी लःल्हाःगु खः ।